Апат салдарынан жеңіл көлікте отырған әйел оқиға орнында көз жұмды. Сол сәтте Шымкент қаласынан Алматы қаласына бағыт алған Van Hool (мемлекеттік нөмері 8213 FA 13) автобусы апатқа ұшыраған көлікті айналып өтпек болып, аударылып, 8 жолаушы оқиға орнында қаза болды. Сонымен қатар 42 адам зардап шеккен. Көлік ішінде 46 азамат болған болса, кейіннен олардың қатарында Өзбекстан және Тәжікстан азаматтарының болғаны анықталды. Ал қалған 2 жолаушы – қазақстандық азамат.
Облыс әкімдігі баспасөз қызметінің хабарлауынша, оқиға орнына жедел түрде Қордай ауданының әкімі Болатбек Байтөле және жедел жәрдем, төтенше жағдай қызметтері жетіп, зардап шеккендерді Отар стансасындағы және Қордай ауданындағы ауруханаларға жеткізді. Апатқа ұшырағандардың 2-еуі ауруханаға жетпей көз жұмғаны белгілі болды. Сонымен апат салдарынан 11 адам қаза тапты. Сондай-ақ 5 адам ота үстелінде, ал 3 адам жан сақтау бөлімінде жатыр. Жарақат алған басқа жолаушыларға тиісті көмек көрсетілуде. Зардап шеккендерге жедел көмек көрсетуге облыстық денсаулық басқармасының басшысы Марат Жұманқұлов бастаған 3 оташы-дәрігер тікұшақпен Қордай ауданына барды.
М.Жұманқұловтың айтуынша, бүгінгі таңда 31 азаматқа медициналық көмек көрсетілген. Сонымен қатар 9 азамат Өзбекстан Республикасы Төтенше жағдайлар министрлігінің желісі арқылы Өзбекстан Республикасына ауыстырылған. Ал 4 азамат Қордай аудандық ауруханасына жатқызылған болса, 5 жолаушы №1 Тараз қалалық ауруханасына жатқызылған.
Ал 9 адамды туыстары Алматы қаласына алып кетсе, 4 адам туыстарының көмегімен Шымкент қаласына жеткізілген. «Әскери госпитальден барлық науқастар Қордай аудандық орталық ауруханасына ауыстырылды. Ауруханада жатқан науқастар қажетті дәрі-дәрмектермен толық қамтамасыз етілген», дейді М.Жұманқұлов.
Орын алған оқиғаға қатысты облыс әкімі Асқар Мырзахметовтің тапсырмасымен Тараз қаласында арнайы комиссия құрылды. Сонымен қатар тәулік бойы қауырт желі іске қосылды. Комиссия құрамында облыс әкімінің бірінші орынбасары Бекболат Орынбеков, облыстық полиция департаментінің бастығы, полковник Арман Оразалиев және басқа да тиісті лауазым иелері бар. Комиссия оқиға орнына барып, жол-көлік оқиғасының мән-жайын анықтап, зардап шеккендерге сапалы көмек көрсетуді ұйымдастыруда. Сонымен бірге оқиға орнында облыс прокуроры Жарқын Құсайынов жұмыс істеді. Ал апатқа қатысты Қазақстан Республикасы Қылмыстық кодексінің 345-бабының 4-тармағына сай қылмыстық іс қозғалды.
Бүгінгі таңда Жамбыл облысында жалпы ұзындығы 266 шақырымды құрайтын республикалық маңызы бар «Мерке-Шу-Бурылбайтал» автожолының қайта жаңарту жобасы 101 миллиард теңгені құрайды. Жамбыл облыстық жолаушылар көлігі және автомобиль жолдары басқармасының басшысы Бақытжан Жәнібековтің айтуынша, қытайлық «Синь-Синь» және отандық «АБК Автодор НС» біріккен компаниялары тарапынан аталған автожолды қайта жаңарту жұмыстары биылғы 7 сәуірден басталған. Жоба 2019-2022 жылдары іске асырылатын болады.
Жамбыл облысы
