Маңғыстау облыстық музыкалық драма театры Шымкент тұрғындарына үздік қойылымдарын ұсынды

Аймақтар • 24 Сәуір, 2019

Маңғыстау облыстық музыкалық драма театры Шымкент тұрғындарына үздік қойылымдарын ұсынды

573 реткөрсетілді

Шымкентке гастрольдік сапармен Маңғыстау облыстық музыкалық драма театры келді.

Ақтаудан гастрольдік сапармен келген Н.Жантөрин атындағы Маңғыстау облыстық музыкалық драма театры қала әкімдігінің ақпараттық-коммуникациялық орталығында кезекті өнер сапарының жоспарымен бөлісті.

2003 жылдың 21 наурызында Ғ.Мүсіреповтің «Қыз Жібек» музыкалық драмасымен ашылған өнер ұжымын бастап келген театр директорының орынбасары Тоқтамұрат Тілеу аталған мекеме туралы қысқаша таныстырып өтті.

«Құрамында 200-ге жуық қызметкері бар шығармашылық ұжым 16 жылдың ішінде үш халықаралық және бір республикалық театр фестивалінің Бас жүлдесін, бірнеше рет атаулы номинациялады иеленген. Өзіміз фестивальді көп ұйымдастырамыз және байқауларға көп қатысамыз. Құр қол қайтқан кезіміз жоқ. Алдағы жоспарларымыз туралы айтар болсақ, заманымыздың заңғар жазушысы, кемеңгер қайраткері Ә.Кекілбаевтың 80 жылдығына орай ТҮРКСОЙ ұйымымен бірлесіп және ҚР Мәдениет министрлігінің қолдауымен «Әбіш әлемі» атты І Халықаралық театр фестивалін өткізуге дайындалып жатырмыз. Осы реткі сапарымызда 22-25 сәуір күндері шымкенттік көрермендерге «Шыңырау» (драма), «Атың өшсін,...!» (трагифарс), «Әлиханның аманаты» (реквием), «Ханума» (поп-арт музыкалық комедия) қойылымдарын ұсынбақпыз», деді Тоқтамұрат Тілеу.

«Еліміздегі ең жас театр болсақ та, актерлеріміз өздерін шығармашылық тұрғыдан үнемі шыңдап келеді», дейді қонақтар. Оның жарқын дәлелі ретінде «Дарын» мемлекеттік жастар сыйлығының және «Еңлікгүл» кәсіби сыйлығының иегері Медғат Өмірәлиевты айтуға болады. Мұнан бөлек, театр әртістері отандық сериалдар мен фильмдерге («Күләш», «Қыз жолы», «Ақылдың кілті», «Тар заман», «Балуан Шолақ») түсіп, ұлтымыздың көптеген мемлекет және өнер қайраткерлерінің рөлдерін сәтті сомдап, республика көрермендерінің арасында танымалдыққа ие болған.

Театр әртістері алдағы екі күнде қала тұрғындары мен қонақтарын Шымкент қалалық орыс драма театрына өз өнерлерін тамашалауға шақырды.