Елбасы Нұрсұлтан Назарбаевтың атына Қазақстан Республикасының Президенті өкілеттігін тоқтатуына байланысты қазіргі және бұрынғы мемлекеттер басшыларынан жеделхаттар мен хаттар келіп түсуде.
Ұлыбритания Премьер-министрі Тереза Мэйдің хатында Нұрсұлтан Назарбаевтың басшылығымен Қазақстанның өсіп-өркендеген мемлекетке айналғаны және бүкіл әлем бойынша серіктестері бар екені атап өтілген.
Франция Президенті Эмануэль Макрон жеке өзінің және француз халқының атынан Нұрсұлтан Назарбаевқа ел дамуының жаңа кезеңінде табысқа жете беруіне тілектестік білдірген.
«Тәуелсіз Қазақстанның жүріп өткен жолын үлгі тұтарлық деуге болады. Сіздің басшылығыңызбен және өзіңіз тәрбиелеген жаңа кадрлардың арқасында елдеріңіз ірі мемлекет ретінде қалыптасты. Өзекті халықаралық мәселелерге қатысты сындарлы ұстанымы Қазақстанды әлемдік деңгейдегі маңызды елге айналдырды», делінген жеделхатта.
«Қазіргі заманғы тарихта көшбасшының жаңадан құрылған мемлекетті заманауи мықты елдер сияқты өркендетіп, алға жетелеп шығарған мысалдары аз. Ондай көшбасшылардың аса көрнекті мемлекет қайраткеріне айналған мысалдары да сирек. Танымал көшбасшының өз еркімен өкілеттігін тоқтатуы одан да сирек кездеседі. Қазақстанды соңғы отыз жылға жуық басқарып, билік тізгінін ұстайтын басшылардың жаңа буынын тәрбиелеу жөніндегі шешіміңіз арқылы парасаттылық таныттыңыз», делінген хатта.
Канаданың бұрынғы Премьер-министрі Жан Кретьен өзінің хатында Елбасының және Қазақстан Республикасының атына ізгі тілегін жеткізген.
