Алғашқы қойылымымен-ақ көкшетаулық жас қауымды жалт қаратқан аталмыш театрдың әлден-ақ нық басқан аяқ алысы көңіл қуантарлық. Таяуда Ақтөбе қаласында өткен төртінші «Балауса» эксперименталды қойылымдар фестиваліне қатысып, олжалы оралды. Бұл өнер додасында Өзбекстан, Армения, Қырғызстан, Татарстанның кәсіби театрларының ұжымдары бақ сынасқан. Көкшетаулық жас театр ұжымы Айгиз Баймұхамбетовтің, Ангиза Ишбулдинаның «Армандар кемесі» спектаклін дайындап апарған болатын. Басты рөлді сомдағандарды да атай кеткен ләзім. Ілияс бейнесінде Жәнібек Махамбетияр, Аружан Бегімді бейнелеген Маулида Нұрғалиева, Фарид рөлін сомдаған Қуан Аманжол, Даян рөлін Қуаныш Жалғас ойнаған. Көркемдік жетекшісі әрі режиссері – Фархадбек Қанафин.
– Өнер байқауы өте тартысты өтті. Қатысушылардың бәрі дерлік сахна мәдениетін жетік меңгерген, кәсіби тұрғыда әбден толысқан актерлер. Ал біздің жастар театрының актерлері Ақан сері атындағы жоғары мәдениет колледжінің білім алушылары, – дейді Фархадбек Қанафин, – колледж директоры Құралай Ыдырысова біздің талабымызды қолдап, көмегін көп тигізіп отыр. Бұл фестиваль Жастар жылы мен Ақтөбе қаласының 150 жылдығына орай ұйымдастырылды. Біз үшін тәжірибе алмасқан, шын шеберліктің шыңын нұсқаған сабақ болды. Қазылар алқасының шешімімен «Өзекті сахна тілін іздегені үшін» аталымы бойынша сыйлыққа ие болдық.
