Кездесу алдында Мемлекет басшысы Қ.Тоқаев «Қазақстан электролиз зауыты» акционерлік қоғамының жұмысымен танысты. Президентке кәсіпорынның өндірістік қуаты жылына 250 мың тонна алюминий шығаруға қауқарлы екені мәлімделді.
Мемлекет басшысы өз сөзінде Павлодар облысы еліміздің дамуына зор үлес қосып отырған ірі өндірістік өңірлердің бірі екенін атап өтті.
– Тәуелсіздік жылдары Ертіс өңірінің экономикалық әлеуеті едәуір нығайды. Сіздердің облыстарыңыз Қазақстанның өнеркәсіптік және энергетикалық флагмандарының біріне айналды. Елбасы ұсынған индустрияландыру бағдарламасының арқасында өңірде құны 988 миллиард теңге болатын 90 жоба жүзеге асырылды. Бұл жобалар жанармай-энергетикалық кешенін, мұнай-химия, металлургия және басқа да салаларды қамтиды, – деді Қазақстан Президенті.
Қасым-Жомарт Тоқаев облыс басшыларының назарын халықтың әл-ауқатын арттыруға байланысты мәселелерге аударды.
– Павлодар облысы ауылдарды ауыз сумен қамтамасыз ету жөнінен еліміз бойынша көрсеткіші ең төмен өңірлердің бірі. Бұл мәселені жүйелі түрде жедел шешу керек. «Өңірлерді дамытудың 2020 жылға дейінгі бағдарламасы» аясында 2018 жылы сумен жабдықтау және су тарту жүйелерін жаңғырту үшін республикалық бюджеттен 2,7 миллиард теңге қаржы бөлінді. Үкімет пен әкімге әрбір бөлінген теңгеге қатаң бақылау жасауды тапсырамын. Сонда ғана халықты сумен қамтамасыз ету ісін уақтылы және тиімді шеше аламыз, – деді Мемлекет басшысы.
Қазақстан Президенті аталған өңір үшін экология мәселесі өзекті күйінде қалып отырғанын атап өтті.
– Біз ұлт денсаулығына, саламатты өмір салтын насихаттауға ерекше назар аударамыз. Алайда, кәсіпорындардың қалдықтарына бақылаудың жоқтығынан біздің өндірістік орталықтарымызда күрделі экологиялық ахуал қалыптасып отыр, – деді Қазақстан Президенті.
Мемлекет басшысы облыс әкіміне Үкіметпен бірлесіп, Жастар жылы аясындағы Жол картасында қарастырылған шараларды жүзеге асыруды тапсырды.
– Бізге жұмыспен қамту саласындағы іс-қимылдарды жандандыру керек. Сондай-ақ жұмыс күші көп аймақтардан көшіп келетін халықты қолдау шараларын күшейтуіміз қажет. Бүгінде облыстың жыл сайынғы жұмыс күшіне деген қажеттілігі 25 мыңнан астам адамға жетті. Мұны шешудің жолы қолайлы инфрақұрылымдар, қолжетімді және жалға берілетін баспаналар құрылысы, – деді Қасым-Жомарт Тоқаев.
Соңында Мемлекет басшысы өңірлерді дамыту және халықтың әл-ауқатын арттыру әрдайым ерекше бақылауда болатынын айтып, соттардың қызметі мен заң үстемдігін қамтамасыз ету мәселесіне айрықша тоқталды.
– Әділеттілік – қызметтік жағдайы мен әлеуметтік мәртебесіне қарамастан, барша азаматтың заң алдындағы тең болуы. Заңның үстемдік етуі дегеніміз осы. Бұл соттар қызметіне араласпауды көздейді. Дегенмен, кей кездері құқық бұзушылықтарға қатысты олардың шығарған үкімдері азаматтарымыз үшін оғаш және ақылға қонымсыз болып көрінеді, – деді Қазақстан Президенті.
Қазақстан Президенті Қасым-Жомарт Тоқаев келесі кезекте Павлодар мұнай-химия зауытына барып, аталған өндіріс орнының жұмысымен танысты.
Қазақстан Президентіне кәсіпорынның қазіргі уақытта автомобиль жанармайын, реактивті қозғалтқыштарға арналған жанармай отынын, дизельді және қазандық отынын, өзге де мұнай өнімдерін, сондай-ақ коммуналдық-тұрмыстық мақсатта газ өндіретіні туралы баяндалды. Зауыттың жылдық қуаты – 5,1 миллион тонна. Оның өнімдері ішкі нарыққа жеткізіледі, сонымен қатар Ресейге, Өзбекстанға, Қытайға, АҚШ-қа, Нидерланд еліне, Италияға және Украинаға экспортталады.
Қасым-Жомарт Тоқаев еңбек ұжымымен әңгімелесу барысында өндірістік қуатына ауқымды жаңғырту жұмыстары жүргізілген Павлодар мұнай-химия зауытының ел экономикасындағы рөлі ерекше екенін атап өтті.
Кәсіпорын жұмысшылары отандық өндіріске қолдау көрсеткені үшін Қазақстан Президентіне алғыс білдірді.
Бұл Мемлекет басшысы Қ.Тоқаев Жастар бастамаларын дамыту орталығына барды.
Бұл «бір терезе» қағидаты бойынша жастарға қызмет көрсететін республикадағы алғашқы мекеме саналады. Орталық аймақ жастарына жұмысқа орналасу, мемлекеттік тұрғын үй бағдарламаларына қатысу, кәсіпкерлікті дамыту мәселелері бойынша ақпараттық-консультациялық көмек көрсетеді. Жастарды құқықтық, психологиялық тұрғыдан қолдау және кәсіби бағдар беру орталық жұмысының негізгі бағыттарының бірі. Мұнда айына 2 мыңнан астам адамға қызмет көрсетіледі.
Қасым-Жомарт Тоқаев жастарға айтқан сөзінде тәуелсіздіктің алғашқы күндерінен бастап Елбасының өскелең ұрпаққа ерекше көңіл бөлгенін атап өтті. Мемлекет басшысы жастардың барлық бастамасына қолдау көрсете беретінін жеткізді.
Сапарының соңында Президент Қасым-Жомарт Тоқаев химия-биология бағытындағы Назарбаев зияткерлік мектебінде болды. Мектеп директоры Ринат Жұмабаев Президентті мектептің тыныс-тіршілігімен таныстырды. «2013 жылы ашылған мектепте қазір 644 оқушы білім алуда, – деді Р.Жұмабаев. – 60 оқу кабинетінің 11-і зертхана, екі спортзал, жаттығу залы, 378 орындық мәжіліс залы, 305 орындық асхана мен кітапхана, психологтың кабинеті, баспасөз орталығы, медициналық блок, музыкалық және хореографиялық кабинеттер бар. Мультимедиялық жабдықтармен қамтамасыз етілген. Барлығы 131 педагог жұмыс істейді».
Мектептің 11-сынып оқушысы Дияр Төленов Назарбаев зияткерлік мектебіне 7-сыныпта оқуға түскенін айтты. «Индонезияда, Ресейде, Португалияда, Вьетнамда және Аустралияда өткен халықаралық пән олимпиадаларының жүлдегері атандым, – деді ол. – Бұл – менің ұстазымның, жаттықтырушымның бірлескен жұмысының және мектептегі бүкіл қолдаудың нәтижесі. Физикадан олимпиада – мен үшін өзін өзі дамытудың тәсілі және менің болашақ мамандығым. Болашақта физика саласының ғалымы болсам деймін».
Президентке облыс орталығындағы №34 мектептің физика пәнінің мұғалімі Жасұлан Меңдібаев өңірдегі білім саласында қандай жаңашылдықтар қолданылатынын айтып берді. «Көбі физиканы қиын пән деп ойлағанмен, мен үшін олай емес – деді педагог. – Сабақтарымда шынайы өмірде болған жағдайлар арқылы тәжірибеге негізделген тәсілдерді қолданамын. Сондықтан «Физика инфографикасы» көмекші құралын жасадым. Ол оқушыларыма физиканы қызықты және күнделікті өмірдегі танымдық ғылым ретінде қабылдауға көмектеседі».
Мұғалімді тыңдай отыра, Қ.Тоқаев автордан физикадан есептер жинағын тарту етуін өтінді және бос уақытында оның есептерін шығаруға уәде берді.
Қ.Тоқаев «Қазіргі заманғы Қазақстан» кабинетімен танысты. Оқушылар өздерінің ғылыми жұмыстары туралы баяндады.
– Білім – ең қымбат қазына, – деді Президент. Сондықтан талмай, шаршамай ізденіп, білім алу керек. Бұл – ең таңдаулы мектептердің бірі. Сапалы білім алу үшін барлық мүмкіндік жасалған.
Павлодар облысы
