Фестивальге қатысқан әр ұлт өзінің таным-тарихын, қасиет қалыбын танытатын ұлттық құндылықтарын паш етуге тырысып бақты. Басты ұстанымымыз бірлік деп ұрандатқан ҚХА қарасты этномәдени бірлестіктердің өкілдері жиналғандар назарына өздерінің бай дастархандарын ұсынды. Ұйымдастырушылар шараның негізгі мақсаты халықтар арасындағы ынтымақтастық мәдениетін қалыптастыру. Сол арқылы көпшілікті Қазақстанда тұратын этностардың аспаздық ерекшеліктерімен таныстыру және түрлі этностар арасындағы мәдениетаралық түсіністікті нығайту екенін айтады. Қатысушылар әр этностың қонақ күту салты, тағамдарының денсаулыққа пайдасы, әзірлену әдістері туралы әңгімелеп, ән мен биден шашу шашты.
Фестивальге қатысқандардың ішінде кәсіби аспаздармен қатар мұғалім, дәрігер сынды басқа саланың қазанында қайнаған әуесқой аспаздар да болды. «Қолың тәтті болса, дайындаған астың да дәмі тіл үйіреді. Егер ас жақсы ниетпен, махаббатпен, көтеріңкі көңіл-күймен әзірленсе сөзсіз дәмді болады, дейді тағам көрмесіне қатысушылардың бірі Қазына Бекетова.
м «Бірлік деген ұғымның сөз күйінде қалып қоймай, іспен дәлелденгені қандай жақсы. Үзбей өткізіліп келе жатқан бүгінгі дәстүрлі тағамдар көрмесі соның айғағы» деген қоғам қайраткері Аслы Осман, қиын тағдырдың қилы кезеңінде пана сұрап келген барша жұртты бауырына басқан қазақ елінің құшағы, кең дастарханы қашанда жиылмай келе жатқанын айтады.
