Қазақстан Президенті Қ.Тоқаев кезектен тыс сайлау өткізу туралы өз сөзінде елдегі әлеуметтік-саяси келісімді қамтамасыз ету және әлеуметтік-экономикалық даму міндеттерін шешу үшін болашақ саяси бағытқа қатысты «белгісіздікті жою керек» екенін атап көрсетті. Бұл тұрғыда үміткердің қазіргі саяси бағыттың дәйектілігі мен сабақтастығын қамтамасыз ету қабілеті сайлаушылардың негізгі өлшемі болып табылады.
Кездесу барысында сарапшылар Қазақстанның ішкі және сыртқы саясатының негізгі аспектілерін қарастырып, 2019 жылғы 9 маусымға жоспарланған Қазақстан Республикасы Президентінің кезектен тыс сайлауын талқылады.
ҚСЗИ-дың директоры Зарема Шәукенова алдағы сайлаудың маңыздылығына тоқталды. Оның айтуынша, дауыс беру нәтижелері үміткердің сайлауалды бағдарламаларының негізінде Қазақстанның болашақ дамуын анықтайды.
Талқылау барысында Әлеуметтік жұмыс жөніндегі ұлттық ресурстық орталықтың директоры Ләзат Нұрқатова барлық қазақстандықтардың өмір сүру деңгейі мен сапасын көтеру үшін мемлекеттің әлеуметтік бастамаларын жалғастырудың маңыздылығы мен бірінші кезектілігі туралы пікірін білдірді. Сонымен қатар Орталық Азия өңіріндегі этносаралық және конфессияаралық қатынастарды зерттеу орталығының жетекшісі Айгүл Садуақасова сөз сөйлеп, этносаралық және конфессияаралық бірлік пен келісімнің сақталуы туралы мәселе мемлекеттік дамудың маңызды аспектілерінің бірі болып қала беретінін айтты.
ҚСЗИ директорының орынбасары Санат Көшкімбаев еліміздің сыртқы саясаты туралы әңгімелеп берді. Оның пікірінше, сайлаудың нәтижелері еліміздің сыртқы саясатына жаңа серпін береді және халықаралық аренадағы сенімді әріптес ел ретінде Қазақстанның беделін нығайтады.
Талқылауға Азиялық зерттеулер институтының директоры Сұлтан Әкімбеков, «Қоғамдық пікір» зерттеу институтының жобалар жөніндегі директоры Ботагөз Рақышева, «Қасиетті Қазақстан» ғылыми-зерттеу орталығының жетекшісі Берік Әбдіғалиұлы, Ұлттық ғылыми-практикалық орталық басқармасының жетекшісі Анар Фазылжан, қоғам қайраткері, блогер Ғалым Байтұқ, ішкі және сыртқы саясат саласындағы сарапшылар белсенді қатысты.
