Жалпы, облыс бойынша, атап айтқанда Теміртау, Балқаш, Саран, Шахтинск, Приозерск, Қаражал қалаларында, Абай, Бұқар жырау, Қарқаралы және Нұра аудандарында бұл күні 27 отбасы баспаналы болды.
– Бұл – ең мейірімді және жарқын мерекелердің бірі. Осындай күні бейбітшілік пен келісімде өмір сүру біздің халқымыздың ең басты байлығы екені ерекше сезіледі. Елбасының арқасында елімізде ұлтаралық келісімнің бірегей үлгісі, сенім, ынтымақтастық пен өзара түсіністіктің ерекше ахуалы қалыптасты. Біздің күшіміз осында, – деді облыс басшысы.
Баспаналы болып, қуанышы қойнына сыймаған көп балалы ана Айгүл Әбішева атқарушы билікке деген өзінің алғысын зор тебіреніспен айтты.
– Мен өте қуаныштымын. Осы күнді 19 жыл күттік, міне бүгін, осындай жарқын мерекеде облыс әкімінің қолынан пәтер кілтін алып отырмыз. Менің алты балам бар, бүгінгі күнге дейін пәтер жалдап тұрдық, біраз қиналдық. Бірақ енді бізде бәрі жақсы болады. Осындай сыйлық үшін барлығыңызға рақмет! Бұл күн – біздің отбасы үшін естен кетпес ерекше күн болып қалады, – деді ол.
