Экономика • 07 Мамыр, 2019

Өңірлерге сапар өз нәтижесін береді

771 реткөрсетілді

Кеше Үкіметтің баспасөз алаңында Премьер-Министрдің орынбасары Гүлшара Әбдіқалықова Елбасының «Әлеуметтік қамқорлық» жаңа әлеуметтік шараларының негізгі бағыттарын түсіндіру үшін өңірлерге жасаған жұмыс сапарларын қорытындылады.

Мамырда 1316 пәтер беріледі

Елбасының «Әлеуметтік қамқорлық» атты жаңа әлеуметтік шараларын іске асыру жөніндегі ақпараттық түсіндіру жұмыстарын жүргізу үшін 12 наурыз бен 4 мамыр аралығында Үкіметтің жұмыс тобы республиканың барлық өңірін аралаған болатын. Сапар барысында қандай жұмыстар атқарылғаны жөнінде Г.Әбдіқалықова баяндады. 

– Осы уақытқа дейін 263 кездесу өткіз­дік. 157 елді мекенде болып, 269 адам жеке қа­былдауда болды. Тұрмысы төмен 72 от­басының үйіне бардық. Жалпы саны 

27 мың адамды қамтыдық, – деді ол. 

– Кездесулерді талдай келе халықтың әлеуметтік осал санаттарын, ең алдымен көп балалы және тұрмысы төмен отбасыларды тұрғын үй, атаулы әлеуметтік төлем, жұмысқа орналасу, шағын несие беру, жер телімдерін беру, білім беру, денсаулық сақтау сапасы және басқа да өзекті мәселелер толғандыратынын көрдік. Екіншіден, аудан әкімдіктері­мен, кәсіпорын басшыларымен, бизнес-құрылымдардың жетекшілерімен кездесу өтіп, әлеуметтік еңбек саясаты, жалақысы төмен азаматтардың айлығын көтеру, айлық бойынша қарызды өтеу, еңбек қауіпсіздігін сақтау мәселелері талқыланды. Әлеуметтік көмек бойынша бизнес құрылымдардың белсенділігін ерекше атап өтер едім, – деді Үкімет басшысының орынбасары. Өз сөзінде Г.Әбдіқалықова Алматы облысындағы «Ақтерек» шаруа қожалығының иесі Темірлан Шайнүсіпов деген азаматтың ауылдастарын жұмыспен қамтып қана қоймай, әлеуметтік салаға ақша бөліп жатқанын атап өтті. Бизнесмен ауылында балабақша, спорт алаңын, сауда орталығын салған. 2008 жылдан бастап көп балалы және тұрмысы төмен отбасылар үшін 105 пәтер тұрғызып берген. Сол сияқты Қостанай облысында «Еңбек» бағдарламасы, Қызылорда облысында білім мен ғылымға қатысты бағдарламалар, Ақмола облысында «Денсаулық» бағдарламасы, Жамбыл облысында алғашқы медициналық көмек беру бағдарламасы, СҚО-да еңбек ресурстарының мобильділігі жұмыстарының барысы талқыланды. 

Айта кетерлігі, биылғы мамыр айынан бастап жалға тұрғын үй беріле бастады. 1 мамырда 249 көп балалы отбасы жаңа пәтер алды. Жалпы, мамыр айында бір жылға жоспарланған 7 мыңнан астам пәтердің 1316-сын беру жоспарланып отыр.
– Тұрғындармен кездесу кезінде біз әрбір екінші әйелдің тағдыр тал­қысында қалғанын көрдік. Ең қор­қыныштысы, 5-6 баламен қалған аналар бар. Статистика бойынша бізде жылына 50 мыңға жуық жұп ажырасады, тұрмыстық зорлық-зомбылық бойынша 912 қылмыстық іс қозғалады. Орта есеппен жылына 3 мың еркек алимент төлеуден жалтарады. Бүгінгі таңда алимент төлемеу бо­йынша жалпы қарыз көлемі 5,2 млрд теңге, – деді Г.Әбдіқалықова. Вице-премьер бұл бағыттағы жұмыстардың жалғасатынын айтты, жақында Бас прокуратура, Жоғарғы сот және басқа да мемлекеттік органдардың өкілдерімен кездесулер ұйымдастырып, мәселені бірлесіп шешу жоспарланған.

160 мың отбасына атаулы көмек беріледі

Жиын барысында Еңбек және халық­ты әлеуметтік қорғау министрі Бердібек Сапарбаев табысы төмен отбасыларға атаулы әлеуметтік көмек тағайындау қалай атқарылып жатқанын айтты. 

– Ел ішіндегі жұмыс сапарлары аясында әлеуметтік мәселелердің барлығы­на жауап берілді. Оның қалай шешілетіні жөнінде айтылды. Әр министрлікке қарасты мемлекеттік органдармен бір­ле­се құрылған жұмыс тобы бар. Өт­кен 4 айда жұмыс тобы 11 отырыс өткіз­ді. Жал­пы, қазіргі таңда 160 мың отба­сына атаулы әлеуметтік көмек тағайын­дал­ды, бұл шамамен 806 мыңдай адам, – деді Б.Сапарбаев. Министрдің айтуына қарағанда, сәуір мен мамыр айының өзінде АӘК үшін 23 млрд теңге бөлінген. Жалпы, жыл бойы атау­лы әлеуметтік төлемді төлеу үшін 130 млрд теңге қарастырылған. Орта есеппен әрбір отбасына 105 мың теңге атаулы әлеуметтік көмек беріледі. 

– Бір айта кететін мәселе, әлеуметтік желіде кейбіреулер бұл төлем бірінші тоқсанда төленеді деп жатыр. Қайталап айтарым: төлем жыл бойы төленеді. Бірақ оның ережесіне сәйкес табыс жыл сайын, тоқсан сайын нақтыланып отыратын болады, – деді министр. 

Биылдан бастап атаулы әлеуметтік көмек беру үшін қарастырылатын жеңілдіктердің төрт түрі алынып тас­талды. 

− Мемлекеттік органдармен бірге, әсіресе жеке қожалықтарына, егініне, малына алатын жәрдемақыларына байланысты есептеу жұмыстары жүргізілуде. Жақын арада шешім қабылданады, – деді министр. Б.Сапарбаев өз сөзінде аз қамтылған отбасыларға қосымша көмек жергілікті билік арқылы көрсетілетінін атап өтті. Қазір жергілікті билік тарапынан көрсетілетін көмектің 11 түрі бар. Бұған қоса сол жердегі кәсіпкерлер мен кәсіпорындар арқылы да көмек көрсетіледі. Министр назар аударған мәселенің бірі – халықтың кәсіп ашуына жәрдем беру. 

− Он екі мүшесі сау адамдар жұмыс істеуі керек. Ал биліктің міндеті – соған жағдай жасау. Грант пен микронесие сол үшін беріледі. Мәселен, бір әйел үйінде отырып, тігін тігіп, тамақтың түр-түрін әзірлей алуы мүмкін. Тігін мәшинесінің құны көп болса 300-400 мың теңгені құ­райды. Оны алуға мемлекет көмек бе­реді. Тамақ істейтін құрылғыларды алу­­ға да мемлекет жәрдемдеседі, – деді ол. 

АӘК-ге қатысты даулар, туындаған сұрақтар көп болғаны белгілі. Әлеуметтік желідегі ондай шу басылды. Негізгі түсінбеушілік – табысты есептеуде. Әсіресе малы мен егініне байланысты әңгімелерді білесіздер. Тіпті жиһаз есептелініпті деп жатыр. Жиһазды есептемеу керек. Негізінен біз жергілікті органдарға «үйге барудың керегі жоқ» деп тапсырма бердік. Өйткені әрбір қала түгілі, ауылдардағы тұрғындар бойынша мәліметтердің бәрі бар. Көп көтерілген сұрақ тауық пен жұмыртқаны табыс ретінде есептеуге қатысты болды. Оның ешқайсысы есептелмейді. Алма, шие, құлпынай да есепте жоқ, – деді Б.Сапарбаев. 

Мектептердің мәселесі шешілді

Жиында сөз алған Білім және ғылым министрі Күләш Шәмшидинова апаттық және үш ауысымды мектептердің мәселесі өзекті екенін айтып, оны шешу жолдарын түсіндірді. 

− Бүгінгі таңда елімізде үш ауысымды және апаттық жағдайдағы мектептер­дің бары белгілі. Бұған дейін хабарлағаны­мыздай, алдағы 3 жылда 190 мектеп салынып, оның 89-ы үш ауысымды мектеп мәселесін, ал 13 мектеп апатты жағдайдағы білім нысандарының мәселесін, ал 72-сі орын жетіспеушілігі мәселесін шешетін болады. Министрлік осы жұмыс­тар бо­­йынша терең талдау жұмыс­тарын жүргізіп, аймақтарды нақтылап отыр. Келешекте білім нысандары бала санына байланыс­ты салынады. Мектептердің қашан және қайда салынатынын жергілікті атқарушы билік шешеді, – деді министр.

Өңірлерге сапарлы барысында Ден­сау­­лық сақтау министрі Елжан Бір­танов кадр тапшылығы мәселесі туындап отырғанын айтты.

− Кейбір елді мекендерде, әсіресе ауылдарда учаскелік дәрігерлер екі есе жүктемемен жұмыс жүргізуде. Мұның арты әлбетте медициналық қызмет сапасы­ның төмендеуіне алып келеді. Сондық­тан кадрлар тапшы елді мекен­дер­ге, әсіресе ауылдарға алдағы уақыт­та 6300 жас маман жіберіледі, – деді Е.Біртанов.

Баспасөз конференциясының соңын­да вице-премьер қазақстандықтарды алда келе жатқан Отан қорғаушы күні­мен және Жеңіс күнімен құттықтап, Қазақстанда бүгінгі таңда 1400 Ұлы Отан соғысына қатысушы бар екенін айтты. 9 мамыр мерекесіне орай барлық ардагерлерге 2,3 млрд теңге сомасында материалдық көмек көрсетілетін болады.
Соңғы жаңалықтар

Күлкі керуені № 16

Руханият • Бүгін, 12:04

Ақынға арналған күн

Руханият • Бүгін, 07:46

Қаланы дамыту құжаты дайын

Аймақтар • Бүгін, 07:43

Баспанамен қамтитын басты құжат

Бағдарламалар • Бүгін, 07:23

Ер Едіге және елдік мүдде

Руханият • Бүгін, 07:20

Болмысы бүтін Бағаев

Руханият • Бүгін, 07:19

Ұқсас жаңалықтар