Бұл чемпионатта бірнеше әлем рекорды дүниеге келді. Мысалы, Трамп чемпионаттағы 100-ші сенчуриді және финалдағы 11-ші сенчуриді жасады. Мұнша сенчури-брейк әлем чемпионаттарында бұрын-соңды болып көрмеген еді. Сонымен қатар, ол осы чемпионаттың бас жүлдесі 500 мың фунт стерлингті (249 792 320,95 теңге) жеңіп алған соң, әлемде бір маусым ішінде бір миллион фунт стерлингтен астам табысқа қол жеткізген тұңғыш снукерші атанды.
Осы жеңісінен кейін 29 жасар Джадд Трамп әлемдік рейтингте 1166500 ұпаймен екінші орынға көтерілді. Ал көш басында – 1196500 ұпаймен Ронни О'Салливан тұр.
Еске салсақ, Джадд Трамп пен Джон Хиггинс 2011 жылы әлем чемпионатының финалында күш сынасқан болатын. Ол кезде 21 жасар Трамп 15:18 есебімен тәжірибелі қарсыласына есе жіберген еді.
