Ел чемпионатының 2018-2019 жылғы маусымында жеті команда күш сынасты. Олар – «Астана» (Нұр-Сұлтан), «Алматы Легионы» (Алматы), «Каспий» (Ақтау), Атыраудың қос клубы – «Атырау Барыстары» мен «АГУ Атырау Барыстары», «Синегорье» (Көкшетау) және «Тобыл» (Қостанай).
Тұрақты біріншіліктің қорытындысы бойынша жартылай финалда бақ сынау құрметіне ие болған төрт команда анықталды. Енді осы межеде «Астана» (Нұр-Сұлтан) мен «Тобыл» (Қостанай) және «Алматы Легионы» (Алматы) мен «Атырау Барыстары» (Атырау) өзара шеберлік байқасады. Бұл бәсекелер 18-21 мамыр аралығында өтеді.
Жоғарыда аталған матчтарда жеңіске жеткендері бас жүлде үшін таласса, ұтылғандары қола медаль үшін сайысқа түседі. Шешуші бәсекелер 25-28 мамыр аралығында өтеді.
