Жиынды ашқан вице-премьер Гүлшара Әбдіқалықова әлемнің барлық елдері мен халықаралық ұйымдардың күн тәртібінде тұрған еңбек нарығындағы жаһандық сын-қатерлерді атап өтті. «Қазақстанда осы мәселелерге ден қоюдың жүйелі шаралары қалыптастырылып, жүзеге асырылуда. Құрылымдық реформалар жоспарлы түрде жүргізіліп келеді. Халықаралық озық тәжірибеге жақындау үшін ЭЫДҰ стандарттары енгізілуде», деді Г.Әбдіқалықова. Оның айтуынша, Үкімет алдында ауқымды міндеттер тұр: 2025 жылға қарай лайықты еңбекақысы мен қауіпсіз жағдай қарастырылған 1 млн-нан астам жұмыс орнын құру. Барлық қызметкердің біліктілік деңгейін арттыру. Өмір бойы үздіксіз оқыту үлгісіне көшу үшін жағдай жасау.
Осыдан кейін сөз алған Еңбек және халықты әлеуметтік қорғау министрі Бердібек Сапарбаев еліміздің ХЕҰ бағытын, сондай-ақ ондағы Жаһандық комиссиясының болашақ еңбек саласындағы мәселесі туралы ұсынымдарын толық қолдайтынын жеткізді. «Министрлік жаһандық сын-қатерлер мен елде қалыптасқан үрдістерді ескере отырып, Қазақстан еңбек нарығының болашағы туралы болжам әзірледі. Халықтың саны 2025 жылға қарай 19,8 млн-ға дейін немесе 1,6 млн адамға өсуі мүмкін. Жұмыс күшінің саны 6,7%-ға артып, 9,8 млн адамды құрайды (2017 жылы 9,0 млн)», деді Б.Сапарбаев. Оның мәліметінше, экономикадағы технологиялық жаңғыртуды ескерсек, 2025 жылға қарай кадрларға деген қажеттілік 570 мыңнан астам адамды құрайды. Сондықтан орта және жоғары білікті жұмыс орындарының санын 766 мыңға арттыру көзделіп отыр. Біліктілігі төмен еңбекке деген сұраныс қысқарады. Мұндай жұмыс орындарының саны экономиканың дәстүрлі салаларын жаңғырту есебінен 530 мыңға азаяды.
Сонымен қатар Б.Сапарбаев конференция барысында бірқатар екіжақты кездесулер өткізді. Айталық, Өзбекстан Республикасының Жұмыспен қамту және еңбек қатынастары министрі Шерзод Құдбиевпен жүздесті. Кездесу кезінде Қазақстан мен Өзбекстан Үкіметтері арасындағы еңбекші-мигранттардың еңбек қызметі мен құқықтарын қорғау туралы 2019 жылдан 2020 жылға дейінгі кезеңге арналған келісімді іске асыру жөніндегі бірлескен іс-шаралар жоспарына (жол картасы) қол қойылды.
Жол картасын әзірлеу туралы үкіметаралық келісім Қазақстан Президенті Қасым-Жомарт Тоқаевтың 2019 жылғы 15 сәуірдегі Өзбекстан астанасы Ташкент қаласына мемлекеттік сапарында жасалған. Жол картасына қол қою елдер арасындағы еңбек көші-қонын реттеу саласындағы ынтымақтастықты одан әрі нығайтуға ықпал етпек.
Үкіметаралық келісім шеңберінде еңбекші-мигранттар қабылдаушы мемлекеттің заңнамасына және еңбек шартының талаптарына сәйкес басқа адамдар үшін қауіпті ауруларға арналған тегін медициналық көмектің кепілдік берілген көлемін алу құқығына ие. Еңбек мигранттары үшін ақы төлеу және басқа да еңбек жағдайлары жұмыс беруші мен қабылдаушы мемлекеттің заңнамасына сәйкес еңбек шартымен реттеледі.
Кездесу қорытындысы бойынша министрлер ведомстволар арасында орнатылған іскерлік және достық байланыстарды жоғары бағалайтынын және қол қойылған халықаралық құжат аясында одан әрі ынтымақтастыққа дайын екенін тілге тиек етті.
Бұдан бөлек, Б.Сапарбаев БҰҰ Халықаралық әлеуметтік қамсыздандыру қауымдастығының (ХӘҚҚ) мүшелік қызметтері мен байланысын дамыту департаментінің директоры Грэм Минтонмен кездесті. Тараптар ынтымақтастықтың өзекті мәселелерін талқылады. Кездесуде министр ХӘҚҚ-мен ынтымақтастықтың маңызын және басым бағыттар бойынша ынтымақтастықты одан әрі кеңейтуге мүдделі екенін айтты.
Халықаралық конференция барысында қатысушылар аталған тақырыптар төңірегінде жан-жақты пікір алмасты.
Айта кетейік, Қазақстан Халықаралық еңбек ұйымына (ХЕҰ) 1993 жылдың 31 мамырынан бері мүше. ХЕҰ халықаралық еңбек нормаларын бекітуге және оны орындауға жағдай туғызады, еңбек және әлеуметтік мәселелер бойынша ақпарат беріп, сараптама жасайды.
