Кеңесте шаруаларды сапалы тұқымдармен, жанар жағармаймен, ауыл шаруашылығы техникасымен қамтамасыз ету, сұранысқа ие ауыл шаруашылығы дақылдарының аудандарын әртараптандыру, субсидиялау мәселелері қаралды.
Ауыл шаруашылығы министрі Сапархан Омаров қазіргі таңда барлық өңір көктемгі егіс жұмыстарын жүргізуге кіріскенін, ал оңтүстік өңірлерде егіс жұмыстары аяқталуға тақап қалғанын айтты. Оның айтуынша, егістің жалпы ауданы 22,3 млн гектарды, оның ішінде көктемгі егіс аумағы 19 млн гектарды құрайды.
̶ Дәнді дақылдар 14,5 млн га алқапқа егіледі. Шаруалардың тұқымға деген қажеттіліктері 100% қамтамасыз етілді. Биылғы егінге шамамен 2,5 млн тонна тұқым себілді. Бұл көрсеткіш өткен жылғыдан 100 мың тоннаға артық, – деді министр.
С.Омаров жасаған баяндамада зиянкестер мен арамшөптерден қорғау мақсатында қажетті қоректік заттар мен өңдеуге арналған препараттар сатып алынғаны да айтылды. Бүгінде 267,1 мың тонна тыңайтқыш тиелсе, оның 60%-ы отандық өндірушілерден алынған.
Белгілі болғандай, былтыр ауыл шаруашылығы техникалары 3,5%-ға жаңартылды. Жалпы алғанда, жұмысқа 147 мың трактор, 4 мың бірлік өнімділігі жоғары егіс жиынтықтары тартылған. Мемлекеттік қолдау шараларының аясында 50,6 млрд теңге сомасына 1770 ауыл шаруашылығы тауар өндірушісі қаржыландырылды.
Өз кезегінде Энергетика министрі Қанат Бозымбаев шаруаларды жанар-жағармай материалдарымен қамтамасыз ету барысы туралы баяндады. Оның айтуынша, наурыз-маусым кезеңінде көктемгі дала жұмыстарын жүргізуге 380 мың тонна дизель отыны бөлінген. Бүгінгі таңда қажеттілік көлемінің 81%-ы тиелді.
̶ Белгілеген дизель отынының бағасы литріне 160 теңгені құрайды (193 мың теңге/тонна), операторлардың жеткізу бағаларын ескергенде өңірлердегі орташа бағасы – 174 теңге/литр, бұл нарықтық бағадан 18 теңгеге арзан, – деді Қ.Бозымбаев.
Үкімет басшысы А.Мамин жауапты ведомстволар мен аймақтарға көктемгі егіс жұмыстарын уақтылы аяқтауды тапсырды.
̶ Жалпы, егіс жұмыстары дұрыс ұйымдастырылып жүргізіліп жатыр. Қарқын көңілден шығады. Бұл мәселенің күнделікті бақылауда тұрғанын атап өткім келеді. Ауыл шаруашылығы министрлігі аймақтармен бірге егіс науқанын лайықты дәрежеде әрі уақтылы жүргізеді деген үміттемін. Барлық ұйымдастырушылық және қаржылық бағыттағы жұмыстар аяқталды десе де болады. Жанар-жағармаймен қамтуда да Энергетика министрлігі жағдайды реттеді. Сол себепті, барлық мәселе шешілді деп есептеймін, – деді ол.
Жиында Түркістан, Алматы, Жамбыл облыстарының басшылары және солтүстік өңірлер – Ақмола, Қостанай, Солтүстік Қазақстан облыстарының әкімдері өңірлерде егіс науқандарын жүргізу туралы баяндады. Барлық өңірлер тұқымдардың қажетті көлемімен қамтамасыз етілгені де айтылды.
