Константин Петров «Сайлау туралы» Конституциялық заңға енгізілген өзгерістер мен толықтыруларды таныстырды.
– Бұл жаңалық биліктің өкілдік органдарын қалыптастыруға қатысты, – деді Константин Петров. – Еліміздің өңірлеріндегі мәслихаттардың құрамы сайлаушылар дауыстарының пропорционалды үлесіне сәйкес саяси партиялар ұсынған тізімдер бойынша құрылады. Ал пропорционалды жүйе Норвегия, Финляндия, Дания, Болгария және Литва секілді елдердегі сайлау кезінде қолданылуда.
Бұл күндері сайлаушылардың тізімін нақтылау ісі жүйеленуде. Елімізде 2020 жылдың соңына дейін сайлаушылар тізімі бірыңғай ақпараттық жүйеге келтірілмек. Заңнамаға енгізілген өзгерістерге сәйкес аумақтық сайлау комиссияларының да құзыреті артуда.
Константин Петров кезектен тыс президенттік сайлаудың өткізілу тәртібіне де тоқталды. Кезектен тыс сайлау да заңнамаға сәйкес кезекті сайлау сияқты өткізіледі, тек оның мерзімін Орталық сайлау комиссиясы белгілеуге құқылы, дей келіп, ол сайлау комиссияларын ашық жұмыс істеуге шақырды.
Сонымен қатар облыс әкімінің аппарат басшысы Ағыбай Әмірин өңіріміздің сайлауға дайындығы туралы баяндады. Бұл күндері өңірде 543 учаскелік сайлау комиссиясы жұмыс істеуде. Шағын ауылдарды оңтайландыруға орай 33 учаске қысқартылған. Сайлау комиссиясы жұмысына 3567 адам қатысуда. Әр учаске материалдық-техникалық тұрғыдан толық қамтылыпты.
Сондай-ақ учаскеге бара алмайтын азаматтардың конституциялық таңдау жасауын қамтамасыз ету үшін көшпелі жәшіктер сайлаушылардың үйлеріне жеткізілмек. Мүмкіндігі шектеулі жандарға көмекшілер қарастырылады. Инватаксилер мемлекеттік тапсырыс негізінде қызмет көрсете алады.
Облыстық аумақтық сайлау комиссиясының төрайымы Гүлнәр Аманжолованың айтуынша, өңірдегі барлық сайлау учаскесі пандустармен қамтылған. Арнайы кабиналар да жабдықталған. Ал сайлаушылар тізімі сайлау учаскелеріне берілген. Жалпы тізім бойынша 551 мың облыс тұрғыны дауыс беруге құқылы. Қазір сайлаудың әр кезеңіне байқау жүргізетін ЕҚЫҰ-дан ұзақ мерзімге келген екі өкіл өңірімізде жұмыс істеуде.
Павлодар облысында саяси науқанға дайындық барысы белсенді жүргізілуде, әр кандидат үгіт-насихат жұмыстарын жалғастырып, аумақтық сайлау комиссиялары әзірліктерін пысықтауда.
Суретті түсірген Валерий Бугаев
Павлодар облысы
