Дебатқа қатысқан кандидаттардың ішінде көзге түскен 3-4 адамды ерекше атап өтуге болады. Маған, әсіресе, Әли Бектаевтың сөздері нанымды болып көрінді. Ол көп тақырыпқа барған жоқ. Өзінің ұстанымында тұрақты болып қалды. Тек қана ауыл шаруашылығына қатысты мәселелерді көтеріп, қарсыластарының сұрақтарына белсенді жауап бере алды. Сондай-ақ Мәулен Әшімбаевтың сөйлеу шеберлігі ұнады. Оның бұл дебатқа әбден дайындалғаны көрініп тұрды.
Әміржан Қосанов өзінің мүмкіндігін барынша пайдалануға тырысты. Алайда, оның сөздері мен күткендей жалынды әрі белсенді болмады. Шынын айту керек, осы додада көңілден шықпайтын тұстар кездесті. Коммунистер мен кәсіподақтардың атынан түскен екі кандидаттың сөздерінде бірізділік байқалмады. Әрине, шектеулі уақыт ішінде үлкен тақырыпты алып шығу қиын екені белгілі. Сондықтан мұндай дебаттардың барынша көп болғаны дұрыс. Мұны қоғамның саяси мәдениетін жаңа үрдістерге бастайтын жақсы дүние деп есептеймін.
Айдос САРЫМ,
саясаттанушы
