Халел ЕСЕНБАЕВ
(1892-1938) – қуғын-сүргін құрбаны, 1938 жылы 3 наурызда атылды. Газетті 07.1919-02.1920 жылдар аралығында басқарды. «Ұшқынның» алғашқы редакторы Халел Есенбаев екеніне Орал архивінен алынған құжатта Есенбаевтың өз қолымен толтырылған анкета жауаптары мен 1919 жылдың қазан айында өткен Кирревком мәжілісінен хаттама дәлел. Автор жиналыс қаулысынан үзінді келтіре отырып, «Ұшқын» газетін басқару үшін бес адамнан (Халел Есенбаев, Ешмұхамед Бегалиев, Тамимдар Сафиев, Әмірғали Меңешев, Бернияз Күлеев) алқа мүшесі сайланғанын жазады. Әйтсе де ең басты дәлел Х.Есенбаевтың 1923 жылы өзі толтырған анкета жауаптары болса керек. Онда былай деп жазылған: «Работал членом редколлегии организаций Букгубисполкома «Киргизская правда», «Дурустук жолы», журнала «Мугалим» («Учитель»), редактором органа Киркрай Ревкома «Ушкун» («Искра») – в 1918 и 1919 годах, организаций Букгубкома «Энбек» («Труд»), перевел на киргизский язык Конституцию РКФСР и так прочее» деп жазылған.
Тамимдар САФИЕВ
(1892-1975) газетті 1920 жылдың ақпанынан бастап, сәуірге дейін, екі ай басқарған. Т.Сафиев 30-жылдары қуғындалып, Қазақстанның құрамындағы Қарақалпақ автономиялық облысында еңбек еткен. Кейін Мәскеуге кетіп, сонда тұрған. 1975 жылы қайтыс болған.
Бернияз КУЛЕЕВ
(1899-1923) небәрі 24-ақ жасында өмірден өткен. «Ұшқынның» бірінші саны Б.Күлеевтің «Ұшқынға» деген өлеңімен ашылған. Газетті 1920 жылдың сәуір айынан бастап, қазанға дейін басқарған. Б.Күлеев сыршыл лирик ақын. Нарманбет пен Ғұмар Қараш сияқты Бернияз Күлеев Абай өлеңдерінің көркемдік формасын, әр алуан өрнегі мен өлшеуін қолданды. Оның «Жазғы дала» атты өлеңі «Сегіз аяқтың» өлшем ұйқасымен жазылған. Ол орыс ақындарының да бірқатар шығармаларын қазақ тіліне тәржімалаған.
Смағұл СӘДУАҚАСОВ
(1900-1933) – саяси қуғын-сүргін құрбаны. Газетті 1921 жылы (қаңтар мен ақпан айларының аралығында) бір ай, кейін 1925 жылдың қаңтарынан 1926 жылдың сәуіріне дейін екінші мәрте редактор болған. Смағұл Сәдуақасовтың бүкіл қайраткерлік, азаматтық болмысы жарқырай танылған кезең 1925-1927 жылдар еді. Бұл кезде ол республика халық ағарту комиссары, әрі өлкелік партия комитетінің бюро мүшесі болды. Бұл кезең сонымен бірге Ф.И.Голощекиннің Қазақстан өлкелік партия комитетін басқару кезімен дәлме-дәл келеді.
Жүсіпбек Аймауытов
(1889-1931) газетті 1921 жылдың ақпанынан бастап 1921 жылдың қазан айына дейін басқарған. 1929 жылы басталған кеңестік қуғын-сүргін кезінде қамалып, 1931 жылы атылған. 1919-1922 жылдары Республика Халық ағарту комиссариатының алқа мүшесі, Семей губерниясы оқу бөлімінің бастығы, «Қазақ тілі» газетінің редакторы. «Еңбекші қазаққа» да басшылық жасайтын кезі осы тұс. Ж.Аймауытов қысқа ғана ғұмырында «Қартқожа», «Ақбілек» сынды қаншама роман, повесть-пьесаларын жазды. «Психология», «Жан жүйесі және өнерді таңдау», т.б. сынды ірі ғылыми еңбектері бар.
Мұхтар Әуезов
(1897-1961) қуғын-сүргін көрді, аман қалды. Газетке 1921 жылдың қарашасынан бастап, 1921 жылдың желтоқсанына дейін басшылық еткен. 1918 жылы М.Әуезов Семей қаласының өкілі ретінде Омбы қаласында өткен жалпы қазақ жастарының құрылтайына қатысып, орталық атқару комитетіне мүше болып сайланды. Құрылтайда «Алашорда» үкіметі мен Алаш қозғалысының бағытын ұстанған «Жас азамат» атты Бүкілқазақстандық жастар ұйымы құрылды. Ұйымның белсенді мүшесі бола жүріп, «Абай» ғылыми-көпшілік журналын Ж.Аймауытовпен бірігіп шығаруға атсалысады. 1930 жылы идеялық көзқарасы үшін тұтқынға алынған.
Әбдірахман Байділдин
(1891-1931) Омбыдағы мұғалімдер семинариясын бітірген соң «Бірлік» ұйымының мүшесі әрі хатшысы болды. Ол «Еңбекші қазақты» басқарғанға дейін 1923 жылы Орал облыстық партия комитетінің үгіт және насихат бөлімінің меңгерушісі, «Қызыл ту» газетінің редакторы болып істеген. «Алдымыздағы мақсатымыз», «Оқытушылар мен кәсіпшілер қозғалысы», «Оқу қызметкерлеріне жолбасшы», «Жаңа әліппе» деген еңбектердің авторы. Газетті 1922 жылдың қаңтар айында ғана басқарған Ә.Байділдин қуғын-сүргін құрбаны болып, 1931 жылы 21 сәуірде атылған.
Бейімбет Майлин
(1894-1938) мұғалім бола жүріп «Қазақ», «Ауыл» газеттері мен «Айқап», «Садақ»
журналдарына мақала, әңгіме жазып тұрған. Б.Майлин «Еңбекшіл қазаққа»
«Еңбек туы» болып тұрған кезден-ақ қызметкер, бөлім меңгерушісі, хатшысы, редакторы
болған. Б.Майлин газетті 1922 жылы басқарған. 1923-1925 жылдары
Қостанайдағы губерниялық «Ауыл» газетін шығарған.
30-шы жылдары «Ауыл тілі», «Қазақ әдебиеті» басылымдарының бас редакторы
болып істеген.
(Жалғасы бар)
