Көздің жауын алатын көркем туындыларды бір қараған адам баланың қолынан шыққан шығарма деп мүлде ойламайды. Айтар ойлары терең, қылқаламдары төселген кәнігі шебер қолдардан шыққан шынайы туындылар. Көрмені аралай жүріп байқағанымыздай, қазіргі жас ұрпақ өмірге бірнеше ракурстан қарай алатындығына таңданасың. Мәселен, бір ғана Нұрсейіт Алтынарай есімді 10 жасар суретшінің «Алмұрт» атты туындысы бізді біраз ойға жетеледі. Балдырған суретші сол алмұрттың ішіне алмұрт ағашының суретін сыйғызған. Бұл нені аңғартады? Жалқы арқылы жалпыға үңілу – терең пайым дегенге саяды.
Көрмеге қонақ болып келген Қазақстан Суретшілер одағының мүшесі Еркінбек Есімов те осы ойларымызды қуаттады. «Балалардың қолынан шыққан картиналар шынайылығымен құнды деуге болады. Олар өз қиялдарында табиғатты, жан-жануарлар әлемін, тіпті адам психологиясының өзін дәл суреттейді. Өз жұмыстарына бейжай қарамайтындықтары оларды үлкен жетістіктерге жетелейді», деді суретші Е.Есімов.
