Сәкен Сейфуллин
(1894-1938) 1917 жылы қазақ комитеті құрылғанда әуелі орынбасар, біраздан кейін оның бастығы болып сайланды. «Жас қазақ» ұйымын құрып, «Тіршілік» атты газет шығарған. 1922 жылдың көктемінде Сәкен қасына бір топ серіктерін ертіп, Бетпақдала арқылы Түркістанға өтіп, Ташкентке барады. Орынборға қайтып келген соң «Еңбекші қазақ» газетінің редакторлығы мен Оқу халық комиссариатының орынбасарлығына тағайындалады. С.Сейфуллин газетті 1922 жылдан 1924 жылдың сәуіріне дейін басқарған. Кезінде «Қызыл сұңқар» атанып, Кеңес өкіметін орнатуға белсене атсалысқан Сәкен Сейфуллин де қызыл қуғын-сүргіннен қашып құтыла алмаған. Ақын жазықсыз тұтқындалып, 1938 жылы ату жазасына кесіледі.
Молдағали Жолдыбаев
(1887-1938) газетті 1924 жылдың сәуірінен бастап сол жылдың желтоқсанына дейін басқарған. 1910-1918 жылдары қоғамдық жұмыстарға белсене кіріседі. «Айқап» журналына, «Қазақ» газетіне еңбекші халықтың мұң-мүддесін көздейтін мақалалары жарық көріп тұрады. «Еңбекші қазаққа» қазақтың белді ақын-жазушылары Бейімбет пен Сәкен кезек-кезек басқарып тұрған кезеңде жауапты редакторлыққа келеді. М.Жолдыбаев 1927 жылдан бастап шыға бастаған ұлттық педагогикалық арнаулы басылым – «Жаңа мектеп» журналының алғашқы редакторы болады.
Тұрар Рысқұлов
(1894-1938) Комитерн АК Орта-Шығыс бөлімі меңгерушісінің орынбасары, сонымен қатар 1924 жылдың ортасынан 1925 жылдың шілдесіне дейін Комитерннің Моңғолиядағы өкілі, 1926 жылы БК(б)П Қазақ өлкелік комитетінің баспасөз бөлімінің меңгерушісі және өлкелік «Еңбекші қазақ» газетінің жауапты редакторы қызметтерін атқарған. Газетке 1926 жылдың сәуірінен бастап 1926 жылдың маусымына дейін редактор болған. 1926 жылдың маусымынан 1937 жылдың шілдесіне дейін РСФСР халкомкеңесі төрағасының орынбасары болып, репрессияға ұшыраған.
Ораз Жандосов
(1889-1938) Түркістан КП ОК-нің үгіт-насихат бөлімінің меңгерушісі және БК(б)П Қазақ өлкелік комитетінің екінші хатшысы болған. 1923-1924 жылдары Мәскеудегі К.Тимирязев атындағы ауылшаруашылық академиясында оқыған. 1924-1928 жылдары БК(б)П Қазақстан өлкелік комитеті үгіт-насихат бөлімінің меңгерушісі қызметін атқарған. «Еңбекші қазақ» газетіне басшылық жасаған кездері, міне, осы қызметте жүрген кезбен тұспа-тұс келеді. О.Жандосов газетті 1926 жылдың маусымынан 1926 жылдың шілдесіне дейін басқарған.
Ораз Исаев
(1899-1938) газетті 1926 жылдың шілдесінен 1926 жылдың тамызына дейін басқарған. Бұл жөнінде белгілі ғалым Темірбек Қожакеев «Егемен Қазақстанның» 1994 жылғы 14 желтоқсанда шыққан «газеттің алғашқы керуенбасылары» деген мақаласында былай деп жазады: «1926 жылғы шілденің 13-і мен тамыздың 30-ы аралығында газет редакторы О.Исаев болды Бұл тұста ол Қазкрайкомның ұйымдастыру бөлімін басқарған. Кейін он жылдай Халық Комиссарлар Кеңесіне төрағалық еткен іскер де беделді қызметкер болған».
