– Пластик қалдықтардың зияны туралы соңғы 5 жылдан бері тұрақты зерттей келе, нарыққа экономикалық тиімді балама ұсынуды жөн көрдім. Стақанды 3 жастағы бала да қиындықсыз қолдана алады, – дейді аталған компанияның директоры Сапаргүл Рабаева.
Иә, стақандарды қолданатын өз орны бар. Мысалы, жүздеген адам қатысатын жиындарда, университет, сауда алаңдары, емханалар, мектеп сынды кез келген қоғамдық орындарда кәдеге жаратуға болады. 100 пайыз табиғи ағаш талшықтарынан d2w технологиясымен жасалған қағаз ыдыс табиғатта сыртқы факторлардың әсерімен ең көбі 18 айда түк қалмай ыдырап кетеді. Ол бұл идеяны іске асыруына мына бір жағдайдың себеп болғанын айтады.
– Бір күні баламмен мешітке бардым. Балам су ішкісі келіп мазамды алды, ал су толтырылған диспенсердің қасында ыдыс болмады. Жақын маңайда дүкен де жоқ еді. Әсіресе аяғым ауыр кезде ұзақты күн емханада жүргенімде кейде су ішетін ыдыс таба алмай қалған кездерім болды. Ақыры ойлана келе осы жобаны қолданысқа енгізу қажет деп таптым, – дейді ол. Ол стақандардың белгілі бір көлемін Қытайдағы өндіруші компанияға тапсырыс беру арқылы жасатқан. Ендігі арманы Нұр-Сұлтан қаласында бір реттік қағаз стақандар өндіру бойынша кәсіпорынның қызметін ұйымдастыруды көздейді.
Оның айтуынша, пластик қалдықтарды қабылдау пункттерін құру, тұрмыстық және өнеркәсіптік қоқыстарды сұрыптау және кәдеге жарату бойынша инфрақұрылымды едәуір жақсарту қажет. Сондай-ақ Қазақстан азаматтарын экологиялық сауатты ету деңгейін қамтамасыз ететін нормаларды іске асыру кезек күттірмейтін мәселе деп санайды.
– Күн сайын сан мыңдаған пластик ыдыстарды бір рет қолданып, лақтырып жатырмыз. Бұл теңіздегі қоқыстың 70 пайызын құрайды. Ал зардап шегетін жануарлар ғана емес, су айдындары арқылы ыдыраған пластик бөліктері топырақ, су, ауа арқылы адам ағзасына да түсуі ықтимал. Пластик ыдыстар арзан шығар, бірақ экологиялық ресурстарды сақтап, қайта қалпына келтіру үшін соншалықты үлкен қаражат бөлініп жатыр, – деген Сапаргүл жастарды қоршаған ортаға жауапкершілікпен қарауға шақырады. Сайын даламызға сапарға шықсаңыз, көзіңіз жетер еді: дала толған пластик бөтелкелер, стақандар, әр жерде желбіреген целлофандар ақ жоңқа болып шашылып жатыр. Пластик өнімдерінің зияны туралы қанша мәрте айтылса да, бұдан бас тарта қойғандар бірлі-жарым. Әсіресе біз сияқты экологиялық мәдениеті толық қалыптаса қоймаған елдер үшін бұл нағыз апатқа апарар жол екенін ұғынуымыз тиіс, – дейді кәсіпкер.
