Жиынның ашылуында сөз алған Премьер-Министрдің орынбасары Гүлшара Әбдіқалықова қонақтар мен қатысушыларды құттықтап: «Цифрлы қоғам мен білім экономикасы бар жаңа жаһандық өркениет туындауда және біздің еліміз осы уақыт талаптарына сай болуы керек. Ал жастар еліміздің қазіргі әлемдегі бәсекеге қабілеттілігінің негізгі факторы болуы тиіс», деді. Г. Әбдіқалықова форум магистральды идеялар мен адами капиталды дамыту жобаларын әзірлеудің жүйелік алаңына айналғанын атап өтті. Премьер-Министрдің орынбасарының айтуынша, мемлекеттік саясаттағы басымдықтардың бірі – білім беруді дамыту. Қазір көпдеңгейлі жүйе жұмыс істеуде, сондай-ақ заңнамалық база жетілдірілуде. Үдемелі дамудың бірден бір куәсі – жоғары оқу орындары санының 131-ге дейін артуы. Онда 540 мыңнан астам студент білім алып жатыр.
Өз кезегінде сөз алған Назарбаев Университет президенті Шигео Катсу бүгінде біздің өзгермелі, күтпеген, күрделі және бір мәнді емес әлемде өмір сүретінімізді еске салды. «Біз сандық прогресс, компьютерлік технологияларды дамыту, жасанды интеллект, big data дәуірінде өмір сүреміз. Жасанды интеллект жүйесі бір жағынан адам ресурстарын ауыстыратын дәуірде, бірақ екінші жағынан жаңа мамандықтар үшін қажеттілік туғызады. Әлем өзгеріп жатыр, сондықтан бізге, жоғары оқу орындарына, студенттерге біздің клиенттеріміз ретінде ұсынатын қызметтерді жақсарту үшін форум тақырыбына қойылған сұраққа жауаптарды анықтау маңызды», деп атап өтті.
