«Ақ жол» демократиялық партиясынан президенттікке кандидат Дания Еспаеваның республикалық қоғамдық штабы ашық есік күнін өткізді. Іс-шара барысында үміткер сенім білдірілген адамдарымен бірге ресейлік журналистер делегациясын қабылдады.
Тұңғыш әйел кандидатқа Ресейден келген жетекші масс-медианың жиырма шақты журналисі тілектестік білдірді. Брифингте журналистер түрлі сұрақтарын қойып, Д.Еспаеваның сайлауалды бағдарламасына, жеңіске жеткен жағдайдағы алдағы жоспарларына қызығушылық танытты. БАҚ өкілдері әйел затының президенттікке сайлануы тек Қазақстан ғана емес, Орталық Азия елдері үшін қоғамды демократияландыру мен әйелдер рөлінің нығаюы жолындағы маңызды қадам екенін атап өтті.
«Менің сайлауға қатысуым – мен үшін жауапты қадам. Әйел адамның елді басқаруы Қазақстан халқына ерекше көрінуі мүмкін. Сайлаушылар менің сайлауалды науқаныма айтарлықтай назар аударды. Мен мұны жақсылыққа балаймын. Бүгінгі таңда еліміздегі халықтың 52 пайызы – әйелдер, осы нәзік жандылардан қолдау күтемін. Дегенмен, мені қолдап жүргендердің қатарында тек әйелдер қауымы емес, жастар да бар. Әрбір аймақта сайлаушылар сайлауалды бағдарламаммен танысқан соң, мені қолдайтындарын айтып жатты», дейді Д.Еспаева.
Бұл күні жеке азаматтардың өтініші бойынша қабылдау да өтті. Штаб офисіне бас сұққан қауымның сұрақтарына үміткер Д.Еспаева, партия төрағасы А.Перуашев және парламенттік фракцияның депутаттары жауап берді. Нұр-Сұлтан қаласының тұрғындары банк несиесі, баспананы жекешелендіру, жер қатынастары бойынша мәселелер көтерді. Әрбір өтініш «Ақ жол» партиясының депутаттарының бақылауына алынды.
* * *
«Ауыл» халықтық-демократиялық патриоттық партиясы атынан президенттікке кандидат ретінде тіркелген Төлеутай Рақымбековтің сайлауалды бағдарламасы Қостанайда талқыланды. Өңір тұрғындарының басын қосқан жиында кандидаттың сенім білдірілген адамдары бірқатар мәселені ортаға салды. Айталық, еліміздегі жоғары оқу орындары жыл сайын мыңдаған ауыл шаруашылығы маманын дайындап шығарады. Бірақ олардың елді мекендерге барып, еңбек етіп жатқандары шамалы. Сондықтан жастарды ауылға тартатын мықты ынталандыру тетіктері керек.
«Ауыл шаруашылығы мамандарын дайындайтын еліміздегі ең ірі 3 университеттің өзі жыл сайын 8 мыңға жуық студенттің қолына диплом береді. Оның сыртында салалық институттар мен колледждер қаншама. Егер осы мамандардың бәрі ауылдарда еңбек етсе, біз әлдеқашан аграрлық державаға айналар едік. Бірақ өкінішке қарай, олар қалада қалып, басқа салаларда еңбек етуге мәжбүр», дейді Т.Рақымбеков.
Т.Рақымбековтің осы және басқа да бастамалары Қостанайда кеңінен сөз болды. Оның шопан, диқандардың еңбекақысын көтеру, лайықты зейнетақымен қамтамасыз ету сияқты ұстанымдарына да көпшілік қолдау көрсетті. Сондай-ақ президенттіктен үміткер ұлттық дәстүрді дәріптеп, отбасылық негізді нықтап қалыптастыруға шақырды.
Үгіт-насихат науқанының аяқталуына аз қалды. Ал Т.Рақымбековтің аймақтардағы қоғамдық штабтары қарқындарын бір сәтке де бәсеңдетпей, неғұрлым барлық өңірдің тұрғындарын қамтуға барын салуда. Осындай форматтағы жиындар, еріктілерден құралған топтардың акциялары кандидаттың сайлауалды бағдарламасындағы бағыттарды ел арасында кеңінен таратуға септігін тигізіп жатыр.
* * *
Кәсіподақтар федерациясынан президенттікке кандидат Амангелді Таспиховтың Түркістан облысы және Шымкент қаласы бойынша қоғамдық штабы өкілдері үгіт-насихат шараларын жалғастырып, түрлі еңбек ұжымдарымен кездесуде. Мемлекеттік, банк және қоғамдық қызмет көрсету қызметкерлерінің салалық кәсіподағының Түркістан облыстық және Шымкент қалалық филиалының төрайымы Күлдар Есебаева аталған қалада Мемлекеттік арxив кызметкерлерімен кездесті. Үміткердің сенім білдірілген адамы сайлауалды бағдарламаны жан-жақты таныстырды. Әсіресе А.Таспиховтың барлық жұмыскердің еңбекақысын көтеру, жоғары білімді тегін алу, еңбек қауіпсіздігін жақсарту мақсатындағы жұмыс жоспарларын сараптап берді. Оның еңбеккер құқы мен мүддесін қорғаудағы ұстанымдарына жеке-жеке тоқталып, еңбек қауіпсіздігі, еңбек миграциясы мәселелеріне қатысты ой-пікірлері сөз болды.
К.Есебаева кандидатты барлық қырынан таныстырып болған соң сайлаушылар тарапынан түскен сауалдарға жауап берді. Сөйтіп кезекті сайлаудың ерекшелігін ескере отырып, межелі күні өз таңдауларын жасауға шақырды.
Сонымен қатар оңтүстіктіктер үгіт-насихат жұмыстарының аясында концерт, дебат, спорттық шаралар ұйымдастыруға мұрындық болуда. Сондай бастамалардың бірі «Келешек» жастар кеңесі мүшелерінің қатысуымен Ордабасы ауданы Амангелді ауылында орналасқан «Санаторий Қайнар» мекемесінде болды. Еңбек ұжымымен, емделушілермен кездесуде белсенділер алда келе жатқан сайлаудың маңыздылығын, ерекшелігін түсіндіріп, дауыс беруден қалыс қалмауға шақырды. Бұл санаториялық курортта 5 бірдей емдік корпусы жұмыс істейді. Емдеу мекемесінің айырмашылығы сол, мұнда дәрігерлер ыстық сумен, термалды сумен асқазан дертінен, сондай-ақ көптеген басқа барлық ауру түрін емдейді. Жергілікті халықты айтпағанда, еліміздің өзге де аймақтарынан демалушылар келіп, ем-дом алады.
* * *
Қазақстан Коммунистік халық партиясы атынан сайлауға түсіп жатқан Жамбыл Ахметбековтің сенім білдірілген адамдары Нұр-Сұлтан қаласының сайлауалды штабы «ҚКХП саламатты өмір салтын қолдайды» флешмобын ұйымдастырды. Жастар сарайының жанына партия белсенділері мен бір топ жас жиналды.
Қалалық сайлауалды штабының жетекшісі Нұрдәулет Оразханов қатысушылар алдында еліміздегі ең ірі саяси науқан кезіндегі азаматтар мен мемлекеттің ортақ жауапкершілігі туралы сөз сөйледі. Ол президенттіктен үміткер Ж.Ахметбековтің өңірлердегі жұмыс сапарлары мен сайлаушылармен кездесулері жөнінде хабардар етті. Оның айтуынша, қатардағы азаматтар партияның жұмысына, оның идеялары мен ұстанымдарына қызығушылық танытып жатыр. «Қазақстан Коммунистік Халық партиясы әрқашанда қарапайым халық мүддесін қорғауға басымдық береді. Халық коммунистері – интернационализмнің, еуразияшылдық идеяның және XXI ғасырдағы ұлттың ерекше жолының жақтаушысы», деді елордалық штабтың жетекшісі.
Бұдан кейін партия нышандары бейнеленген киім киген жастар кеңес жылдарындағы әуенмен жаттығулар жасады. Жиналғандар «ҚКХП-ға дауыс бер!», «Адал еңбек қоғам мүддесі үшін!» деп ұрандады.
Сонымен қатар Нұр-Сұлтан қаласындағы насихатшылар тобы белсенді жұмыс істеп, өз кандидаттарының негізгі ұстанымдарын халыққа барынша жеткізуде. Олар кезіккен жұртқа үгіт парақшаларын және партия журналдарын таратып, әңгімелесіп, сайлауалды бағдарламаның басым бағыттары туралы мәлімет берді. Қала тұрғындары да түсіністік танытып, коммунистердің бастамасын жылы қабылдап жатыр. Мұндай іс-шаралар әлі де қарқынды жүргізіле бермек.
* * *
Nur Otan партиясынан президенттікке кандидат Қасым-Жомарт Тоқаевтың республикалық қоғамдық штабы Шығыс Қазақстан облысына жасаған сапарын Семейдегі бірқатар кәсіпорында өткізген кездесулермен аяқтады. Қала халқы және этномәдени бірлестіктер өкілдерімен кездесуде ең алдымен Қ.Тоқаевтың сайлауалды бағдарламасында сабақтастық қағидасына басымдық берілгені айтылды. Өйткені қазіргі таңда Қазақстан халқының бірлігі мен өзара келісімін сақтау үшін Елбасы жолын жалғастырудың маңызы зор. Бұған қоса, бағдарламада айрықша аталған тағы бір өзекті мәселе – білім беру саласы. Бұл жөнінде құжатта білім мен ғылымға жұмсалатын жалпы шығынды жыл сайын өсіріп отыру, ұстаздар мен тәрбиешілердің мәртебесін көтеру сияқты бағыттар қамтылған.
Сонымен қатар штаб мүшелері Семей қаласындағы Қазақ гуманитарлық-заң инновациялық университетінде жергілікті жоғары оқу орындарының ұстаздарымен және студенттерімен кездесті. Басқосуда бағдарламада көрсетілген жоғары оқу орындары мен колледждерге мемлекеттік білім беру тапсырысын ұлғайту, оқытудың жаңа тәсілдерін енгізу сияқты нақты шаралар сөз болды. Штаб мүшесі, Л.Н.Гумилев атындағы Еуразия ұлттық университетінің ректоры Ерлан Сыдықов кандидаттың білімді ұлт қалыптастыруға үлкен көңіл бөліп отырғанын жеткізді. «Қ.Тоқаев өзінің бағдарламасында білім беру саласына қолдау көрсетіп, бұл жүйені қаржыландыруды арттыру мәселесін көтерді. Осылайша біздің кандидат білім беру саласын одан әрі жетілдіріп, бұл бағыттағы Елбасы салған сара жолды жалғастырады», деді Е.Сыдықов.
Сонымен қатар делегация цемент зауытының және отандық автомобиль өндірісінде озық тұрған «СемАЗ» ЖШС-нің еңбек ұжымдарымен кездесті. Бұл іс-шарада штаб мүшелері халықтың әл-ауқатын арттыруға бағытталған бағдарлама туралы жан-жақты айтып, семейліктерді дұрыс таңдау жасауға шақырды.
* * *
«Ұлт тағдыры» ұлттық-патриоттық қозғалысы атынан президенттік сайлауға түсіп жатқан Әміржан Қосановтың Нұр-Сұлтан қаласындағы республикалық қоғамдық штабы экологиялық іс-шара ұйымдастырды. Насихатшылар тобы Есіл өзенінің жағалауында тазалық жұмыстарын жүргізіп, айналаны бірге көркейтуге шақырды. Көпшіліктің бірлігін жарастырған ортақ іске орталық штаб өкілдерімен қоса, ерікті жастар да атсалысты. Осы бастама аясында кандидаттың сайлауалды бағдарламасының негізгі бағыттары түсіндірілді. Соның ішінде саяси бостандық, ұлттық болмыс, жемқорлық тақырыптары кеңінен қозғалды. «Біз бұған дейін де базарлар мен аулалар секілді халық көп жүретін орындарда түрлі шаралар ұйымдастырып, кандидаттың ұстанымдарын барынша ұғынықты жеткізуге күш салдық. Бүгінгі экологиялық акция сөз жүзінде ғана емес, іспен дәлелдейтін жұмыстың кішігірім көрінісі. Мұнда жиналғандар қолын шаруадан үзбей, құлақтары үндеуге түрік жүр. Сайлауалды науқанның соңғы сағатына дейін бағыт-бағдарымызды халыққа айқындап, барынша дұрыс жеткізуге тырысамыз», деді еріктілердің бірі Батырбек Қошқарбаев.
Бұған қоса, өңірлердегі қоғамдық штабтар да қызу жұмыс істеп, түрлі іс-шаралар ұйымдастыруда. Белсенділер жергілікті тұрғындарға кандидаттың сайлауалды тұғырнамасында көрсетілген бағыттарды жан-жақты насихаттап, үгіт материалдарын да кеңінен таратып жатыр. Бұл ретте қоғамдық штабтар әлеуметтік желілердің әлеуетін де тиімді пайдаланып, еліміздегі ең ірі саяси оқиғаның маңызын да арттыруда.
Сондай-ақ «Ұлт тағдыры» ұлттық-патриоттық қозғалысы атынан президенттікке кандидат ретінде ұсынылған Әміржан Қосановтың өңірлердегі сайлауалды қоғамдық штабтары белсенділік танытып, сайлау күні учаскелерде дауыс беру процесін қадағалайтын байқаушыларға семинарлар өткізіп жатыр.
* * *
«Ұлы дала қырандары» республикалық қозғалысынан президенттікке кандидат Сәдібек Түгел Маңғыстау облысындағы сайлауалды үгіт-насихат жұмыстарын Ақтау қаласынан бастады. Қала тұрғындарының алдында кандидат өзінің сайлауалды бағдарламасы туралы кеңінен әңгімеледі. «Еліміздің батыс аймағындағы іссапарымды мұнайшылар қаласы Атырауда бастасам, бүгін киелі жер Маңғыстаудың орталығы Ақтауда жалғастырдым. Еліміздің теңізге шығар қақпасы саналатын қаланың тұрғындарына ризашылығымды білдіремін. «Ұлы дала қырандары» қоғамдық бірлестігі республика бойынша ұлттық құндылықтарды насихаттап келе жатқан ұйым екендігін жеткізгім келеді. Маңғыстау өңірінің еліміздің экономикасы, демографиясы мен туризміне қосып отырған үлесі зор. Менің сайлауалды бағдарламамда да халқымыздың әл-ауқатын көтеруге, демографиясына зор көңіл бөлуге, жас ұрпақтарды отансүйгіштікке тәрбиелеуге байланысты кезек күттірмей шешетін міндеттер атап көрсетілген. Экономикаға ғана емес, идеологияға да басты назар аударғанымыз дұрыс. Бұл екеуіне де құстың қос қанаты сияқты бір-бірінен ажыратып қарауға болмайды. Сондықтан біздің ұстанымымыз «Ұлағатты ұрпақ – ұлттық ұстаным» деп айқындалып, бағдарламама төрт құндылықты өзек етіп алдық. Тіл, діл, жер мен ар-намыстан биік ештеңе жоқ», деді С.Түгел.
Сонымен қатар кездесу барысында Асқар Бақытжанов, Жансая Ынтымаққызы есімді жастар кандидаттың сайлауалды бағдарламасында айтылған негізгі бағыттар жайлы өз пікірлерін жеткізді. Маңғыстау жеріндегі жиындардан кейін С.Түгел сайлауалды штабының өкілдерімен бірге киелі мекендегі Шопан атаның басына соғып, Пір Бекеттің мәңгілікке дамыл тапқан Оғланды шатқалына барды. Екі әулиенің мекеніне айналған Маңғыстау даласының бір қиырындағы қасиетті орынға зиярат етіп, арнайы дұға бағыштады.
