Қоғам • 13 Маусым, 2019

Шеберлікте шек жоқ

160 реткөрсетілді

Өмірге деген, өнерге деген құлшынысқа ештеңе кедергі келтіре алмайды. Атырауда арбада отырып билеуден алғаш рет өткен ел біріншілігіне қатысушылар нағыз мұқалмас жігер мен ертеңге деген сенімнің үлгісін көрсетті.

Арбадағы биден ел біріншілігі мен би спортынан «Еуразия-2019» халықаралық турниріне 26 жұп қатысты. Еліміздің түкпір-түкпірінен Жайық жағасына жиналған өнерпаздардың мүмкіндіктері шектеулі болғанымен, сахнаға шыққандағы шабытты шақтары көрерменге айрықша әсер етті. 

Ерекше додаға арнайы келген қонақтар қатарында қостанайлық Аруна Жақсығұлова да болды. «Үміт-Надежда» қоғамдық қорын құрып, елімізде алғашқылардың бірі болып «Арбадағы би» жобасын бастаған Аруна Жақсығұлова қамкөңіл жандарға би өнерінің қыр-сырын үйретіп жүр. «Әртүрлі тағдырды бастан кешкен бізді біріктіретін бір нәрсе бар, ол – арбадағы өмір. Әрине пандустардың талапқа сай еместігі, арбаның қымбаттығы се­­­кілді мәселелер аз емес. Бірақ бізге одан да зор әсер ететіні – көңіл, қор­ша­ған ортаның назары. Қоғамдағы бел­сенділігімізді арттырғымыз келеді. Осы ретте бидің маңызы ерекше, адамдармен араласамыз, көпшіліктің ортасында болған кезде көңіл күйіміз де көтеріледі», дейді А.Жақсығұлова. 

Атырауда өткен айрықша шараны «Аэлита» би клубы ұйымдастырды. Оның негізін қалаушылар – облыстық спорттық билер федерациясының жете­кшілері Лидия, Нұрлан Мұқа­новтар. Екі күнге созылған байқаудың жүлдегерлері қатарында Есболат Балбаев пен Айсұлтан Қайырлының есімдері аталды. Сондай-ақ Сәбина Қасымова, Малика Мұқтарова, Михаил Бычковский, Владислав Сахно, Даниял Цыхлер, Александр Чашин, Роман Лит­винов, Есет Дәрібаев, Талғат Аманбеков, Асылбек Қапарбаев, Окса­на Лим, Мақсат Сәрсенбаевтар жүлделі орындарды еншілеп, жоғары нәтиже көрсетті.

Ал «Еуразия-2019» халықаралық спорттық би турнирінде Никита Боос, Санжар Іздібаев, Алмас Тұқпатуллин, Артур Шатов, Дария Қабыл, Толқын Ізді­­баева, Асиля Елеусін, Михаил Фа­дин, Мирас Жаңаталап, Салтанат Өтеш­қали, Ескендір Гохгальтер жеңім­паз болып танылды.

– Осындай шаралар арқылы ерекше қажеттіліктері бар адамдарды оңалтуға, қоғамға бейімдеуге болады. Елбасы бас­тамасымен қолға алынған «Кедергісіз келешек» бағдарламасының маңызы зор, – дейді ұйымдастырушы Лидия Мұқанова.

АТЫРАУ

Баннер
Соңғы жаңалықтар

Алматы облысында жер сілкінді

Аймақтар • Бүгін, 09:36

Ұқсас жаңалықтар