Жалғыз сиыр қырыққа жеткен. Қазір сүт, қаймағын ауылдастары таңсәріден талап алады. Тоқымдай жердегі жылыжай 0,7 гектарға ұлғайыпты. Аумағы атшаптырым жылыжайдың ішінде қияр самсап тұр. Үзіліп алынып, тұтынушының ақ дастарқанына жетіп жатыр. Өңірде қат көкөністі қылтиып көктеген соң құлағынан тартып шығарғандай ыждағаттылықпен өнімді жұмыс жүріп жатыр.
– Қазір қалалық жерде табиғи таза өнім қасқалдақтың қанындай тапшы болып кетті ғой, – дейді серіктестіктің қаржы жөніндегі орынбасары Қарлығаш Тілеуова, – біз алдымен осыны ескердік. Тұтынушы іздеп ешқайда сабылған жоқпыз, құлақтанған жұрттың өзі келіп жатыр. Аудан орталығындағы 25 дүкенмен келісімшарт жасадық. Өнімді өндіру бір бөлек те, өткізу де өзекті мәселе ғой. Бұл орайда бізге аудан әкімдігі көп көмек көрсетіп отыр. Өткен күзде жергілікті кәсіпкерлердің өнімдерін насихаттаған үлкен іс-шара ұйымдастырылды. Сол жерде жарнама жасалды. Ісіміздің алға басуына осындай қамқорлықтар себепші болып отыр.
Жылыжайға наурыз айының басында қияр егіп тастаған екен. Тамшылата суарылады. Ал тыңайтқышқа ешқандай химиялық заттар қолданбайды, бәрі табиғи. Көңді, қайыңның күлін пайдаланады.
– Бапталған өнімнің өзі белгілі болып тұрады ғой. Алғашқыда қиярымызды алып әлдебір дүкенге бардық, әріптес болайық деген ұсынысымызды айттық, – дейді серіктестік басшысы Нұрлан Дайырұлы, – сатушы келіншек қазақтың қияр еге білетініне күдіктенген тәрізді. Кесіп көрсеттік. Сөлі ағып тұр, ал хош иісі дүкеннің ішін алып кетті. Содан кейін дүкен иелері өздері келе бастады.
Қазір серіктестік 10 адамға тұрақты жұмыс беріп отыр. Жұмысшылардың еңбекақылары 110-115 мың теңге шамасында. Аудан орталығы үшін тәп-тәуір жалақы.
Ырыс та ұмтылғанға үйіріледі-ау. Алғашқы жылы өнім көлемі онша көп болмаған. Былтыр 15 тонна қияр өндіріпті. Биылғы меже – 20 тонна. Ерте көктемде солтүстікте қияр бағасы түсе қоймайды. Өйткені дәл осындай жылыжай салып жұмыла жұмыс істеп жатқандар жоққа тән. Жаз ортасында бірер ай баға төмендегенімен, қоңыр күзде қайта шарықтап кетеді. Қазір серіктестік сауда орындарына қиярдың килосын 350 теңгеден тапсырады екен. Көкшетаудың орталық базарында да өнімдерін сататын орындары бар.
Қазір салы суға кетіп, жұмыс жоқ деп сылтау айтатындар көп. Зеренділік кәсіпкерлердің қияр егіп, қаймақ былғап отырған ісін соларға үлгі болу үшін айтқымыз келді.
Ақмола облысы,
Зеренді ауданы
