Желі өткір, күн шуағы мол Маңғыстауда аталған табиғат құбылыстарын пайдаланып, станса орнатамын десе, мүмкіндік зор. Сол себепті Маңғыстау облысында жаңартылмалы энергия көздерін дамыту бағытында бірнеше жобалар іске асырылуда. 2018 жылдың мамыр айынан бастап Мұнайлы ауданы Батыр ауылында қуаты 2 МВт күн электр стансасы пайдалануға берілсе, енді Түпқараған ауданы Ақшұқыр ауылында құны 800 млн теңгені құрайтын жел электр стансасы іске қосылды.
«BEST-Group NS» ЖШС компаниясы аталған станса құрылысын 2017 жылдың күз айында бастаған. Монтаж-құрылыс жұмыстарын отандық мамандар жасап, зауыттың турбиналары халықаралық сапа стандарттарына сәйкес сертификатталған. Қуаты 5 МВт-ты құрайтын кешеннің құрылысы барысында 11 жұмыс орны ашылды, алдағы уақытта жұмыс орны 20-ға дейін жетпек.
– Маңғыстау облысының әкімдігі бізге Түпқараған ауданынан жер телімін берді. «Даму» қорының кепілдігімен біз субсидияланатын мөлшерлемемен банктен несие алдық. Жобаны шетелдік компаниялар инвестициялауда. Атап айтқанда, осы жобаның серіктестері мен инвесторлары америкалық және ресейлік компаниялар – Lone Star Renewable Energy Corp (АҚШ) және «Энерготехсервис» ЖШҚ (Ресей). Жалпы жобаны іске асырудағы басты мақсатымыз – жел электр стансаларын пайдалану арқылы негізгі энергия көздерін ауыстыру, Қазақстандағы парниктік газ қалдықтарын азайту, сол арқылы климаттың өзгеруі туралы БҰҰ-ның негіздемелік конвенциясына сәйкес жұмыс істеу. Енді бір айдан соң біз өз өнімдерімізді сата бастаймыз. Өнімді сатып алушылар «Есептеу және қаржы орталығы» ЖШС болмақ. Германия елінде жасалған қондырғылар арқылы станция, жел қуатын пайдалану нәтижесінде электр энергиясын өндіріп, оған қажеттілікті толық өтейтін болады. Ақшұқыр ауылының тұрғындарына, сондай-ақ ауыл маңындағы өндіріс ошақтары мен жылыжайларға электр қуаты тапшылығын жояды, – дейді жобаның даму жөніндегі директоры Гүлнар Әбитова.
Жаңа нысаннан басқа Түпқараған ауданы Форт-Шевченко қаласында екі бірдей жоба іске аспақ. Қазіргі таңда маусым айында пайдалануға берілетін 42 МВт күн электр стансасы мен жыл соңында іске қосылатын 43 МВт жел электр стансасының құрылыс-монтаждау жұмыстары жүргізілуде.
– Сондай-ақ қазіргі таңда Энергетика министрлігімен үш жобаны жүзеге асыру бойынша жұмыс жасақталып жатыр. Бейнеу, Жетібай және Шетпе ауылдарында қуаты 10-15 МВт-ты қамтитын жел және күн электр стансасының кешенді жұмыстарының жоспары дайындалуда, – дейді Маңғыстау облысының энергетика және тұрғын-үй коммуналдық шаруашылық басқармасының басшысы Жандос Салимов.
Бұл бағытта ауқымды міндетті еңсеру жолындағы жұмыстар жалғаса бермек.
Маңғыстау облысы
