Бұрын қарапайым ота жасату үшін жұрт ірі қалаларды жағалайтын болса, бүгінде аудан орталықтарындағы ауруханаға сеніммен барады. Мәселен, соңғы жылдары облыста өлім-жітім көрсеткіштері мың адамға шаққанда 5,44-ге жеткен. Яғни, 1,8%-ға төмендеген. Қан айналымы жүйесінен өлім-жітім көрсеткіші 10,4%-ға төмендегені көңіл қуантады. Сол сияқты қатерлі ісіктерден болатын өлім-жітім 0,9%-ға, құрт ауруымен сырқаттанушылық көрсеткіші 9,2%-ға төмендеген.
Ана мен бала денсаулығын қорғау мәселесінде де жақсы көрсеткіштер бар. Ана өлімінің алдын алуда жүйелі шаралар жалғасып келеді. Бүгінде 75 млн теңгенің медициналық құрал-жабдықтары алынып, нәтижесінде ана мен бала денсаулығын қорғауға арналған медициналық ұйымдардың құрал-жабдықтармен қамтамасыз етілуі 77%-дан 85%-ға дейін жеткізілді. Жергілікті бюджеттен қаржыландырылатын босанғаннан кейінгі оңалту бөлімшесі 2016 жылы ашылып, жұмыс істеп жатыр.
2017 жылдан бастап қанатқақты режімде, ал 2018 жылдан бастап барлық жүкті әйелдер мен балаларға арналған патронаждық қызмет көрсетудің әмбебап-прогрессивті моделі енгізіліп, жұмыс істейді.
Неонатальды хирургия мамандарының біліктілігін арттыру мақсатында екі маман (хирург, неонатолог) Корей елінде білімін жетілдіріп, нәтижесінде осы сала бойынша хирургиялық белсенділік артты. Сонымен қоса, балалар ауруханасы бойынша көлемді оталар саны былтырғы жылмен салыстырғанда 512 жағдайға немесе 96%-ға өскен.
Хирургиялық ота жасаудың жаңа әдістері тәжірибеге енгізілді. Оның ішінде, шұғыл отаны қажет ететін жағдайы тұрақсыз нәрестелерге, сол мезетте палатада кювез трансформерде ота жасау әдісі, лапороскопиялық ота жасау, эндоскопиялық аденоидоэктомия, краниопластика, өте аз салмақтағы нәрестелерге наркоз беру, Өңеш атрезиясы анықталған нәрестеге ота жасау сияқты ауруларды емдеуде жақсы нәтижеге қол жеткізілді.
Медициналық көмектің сапасын жақсарту мақсатында облыстағы денсаулық сақтау жүйесінің желісі нормативке сәйкестендірілді. Екі жылда 25 медициналық нысан қолданысқа берілді. Соңғы бес жылда елді мекендердегі бастапқы медициналық санитарлық көмек көрсететін ұйымдардың 63%-ы жаңартылды. Ағымдағы жылы Арал, Қазалы аудандық орталық ауруханалары, 3 дәрігерлік амбулатория (Ақжарма, Бекбауыл, Өркендеу) қолданысқа берілді. Ал Шиелі ауданында орталық ауруханасының құрылысы жүргізіліп жатыр.
Денсаулық сақтау саласында облыстағы денсаулық сақтау ұйымдарын заманауи медициналық техникамен жабдықтауға соңғы бес жыл ішінде 8 047,4 млн теңгеге медициналық құрал-жабдық сатып алынып, нәтижесінде медициналық ұйымдардың материалдық техникалық жабдықтармен жарақтандыру көрсеткіші 34,9%-ға өсті.
2018 жылдың 1 қаңтарынан бастап Байқоңыр қаласындағы ОМО филиалында емхана ашылып, оған осы уақытқа дейін Ресей Федерациясының медициналық ұйымдарынан қызмет алып жүрген 25 мыңнан аса қазақстандық тіркелді. Ақай, Төретам елді мекендеріндегі халыққа мамандандырылған медициналық көмектің қолжетімділігін арттыру мақсатында 2019 жылдың 1 қаңтарынан бастап осы елді мекендерде орналасқан медициналық ұйымдар Байқоңыр қаласындағы облыстық медицина орталығы филиалының құрамына берілді.
Амбулаториялық деңгейде берілетін тегін дәрі-дәрмектерге Тегін медициналық көмектің кепілдік берілген көлемі шеңберінде амбулаториялық деңгейде тұрғындарды тегін дәрі-дәрмектермен қамтамасыз ету үшін 2018 жылға бөлінген қаржы былтырғымен салыстырғанда 2 есеге өсіп, 6 млрд 431 млн теңгеге жетті.
Елбасының «Цифрлы Қазақстан» бағдарламасы аясында 32 медициналық ұйымға медициналық ақпараттық жүйелер енгізіліп, көрсеткіш 100%-ға жеткізілді.
Үкімет пен облыс әкімдігінің ұзақ жылдарға арналған кешенді жоспарларының арқасында осындай жетістіктерге жетіп отырмыз. Бүгінде әлемдегі дамыған мемлекеттердің медициналық қондырғылары қазақстандықтарға қызмет ете бастады. Мамандарымыз кәсіби біліктілігі жағынан өсті. Халқымыз ең үлкен байлыққа денсаулықты жатқызады. Қызылорда облысында халықтың денсаулығын жақсарту жолында осындай кешенді жұмыстар жүргізіліп жатыр.
Бақытжан НАРШАБАЕВ,
Қазалы аудандық ауруханасының хирургі
Қызылорда облысы
