Қасым-Жомарт Кемелұлы ішкі және сыртқы саясатта өзінің жоғары біліктілігін, бай тәжірибесін көрсетіп келе жатқан азамат. Мен ол кісінің қайраткер ретінде еліміздің дамуына одан әрі үлес қосатынына, халықтың әлеуметтік жағдайының жақсаруына күш салатынына сенемін. Саясаткер ретінде халықаралық деңгейде беделі жоғары. Қазақстан Республикасының Тұңғыш Президенті – Елбасы Нұрсұлтан Назарбаевтың сара жолын әрі қарай жалғастыруда ол кісіге мен тек сәттілік тілеймін.
Нұр-Сұлтан қаласында өткен Қасым-Жомарт Тоқаевты ұлықтау рәсіміне қатыстық. Президент дүйім халықтың көзінше өзінің он бағыттан тұратын баяндамасын жариялады. Қасым-Жомарт Кемелұлының бұл баяндамасы еліміздің дамуына, әлеуметтік жағдайымыздың бұдан да әрі жақсара түсуіне арналыпты. Одан кейін халықтың адал перзенті ретінде ант берді. Жамбыл облысынан Нұр-Сұлтан қаласына арнайы барған делегаттар да Президенттің батыл да байыпты бастамаларын қолдады. Қасым-Жомарт Тоқаевтың жұмысына сәттілік тілеймін. Бастамаларының бәрін де қолдаймыз. Ел үшін еңбек ететін ердің еңсесі әрқашан биік болсын!
Еркінбек СОЛТЫБАЕВ,
Жамбыл облыстық ардагерлер кеңесінің төрағасы
Жамбыл облысы
