– «2018 жылы экономикалық өсім 4,1 пайызды құрап, алдыңғы жылдың деңгейін қайталады. Биылғы 5 айдың қорытындысы бойынша жалпы өсу 4 пайызды құрады. Министрліктің биылғы алға қойған ең маңызды үш бағыты бар. Олар – елдегі кәсіпкерлікті дамыту, бағалар мен тарифтер және өңірлерді дамыту», – деді Р.Дәленов.
Министрдің айтуынша, 2020 жылғы 1 қаңтардан бастап 1 334 ауылда жергілікті өзін өзі басқару (ЖӨБ) бюджетінің 4-ші деңгейін енгізу жоспарланған. ЖӨБ бюджетінің басты ерекшелігі – жергілікті мәселелерді шешуге 7,6 млн азаматтың қатысуы.
Еліміздегі өңірлік саясат халықтың тұрып жатқан жеріне қарамастан бәсекеге қабілеттілігі мен тұрмыс сапасын арттыруға бағытталған. Өңірлерді дамыту мемлекеттік бағдарламасын 2020 жылға дейін іске асырудың қорытындысы бойынша урбанизация деңгейі 58 пайызға жетті. Бұл 2017 жылмен салыстырғанда 0,8 пайызға артық. 2018 жылы қалаларға су тарту 94,5 пайызға, ауылдарға су жеткізу шамамен 60 пайызға ұлғайды, – деді министр өз сөзінде.
Жиында еліміз аумағы арқылы өтетін интернет-сәлемдеме транзитін 6 есеге ұлғайту мүмкіндігі бар екендігі айтылды.
«Таяу 5 жылдың ішінде электронды сауда айналымының көлемі 1 трлн долларға артуға тиіс. Біз Еуропа мен Қытай ортасында – тұтынушы мен сәлемдемелерді жөнелтушілердің арасында өте тиімді жерде орналасқанбыз. Сондықтан көлік легін Қазақстан арқылы жөнелтудің келешегі үлкен. Ол үшін барлық инфрақұрылым бар. Мұндай сәлемдемелерді рәсімдеу үшін барлық кедендік түзетулер енгізілген. Біз таяу жылдары Қазақстан арқылы интернет-сәлемдеме транзитін 6 есеге ұлғайтуға болады деп есептейміз», деді министр.
Министрдің айтуынша, онлайн-сауданы ынталандыру үшін интернетте электронды әдіс арқылы сауда жасайтындарға табыс салығы мен корпоративтік табыс салығы бірнеше жылға алынып тасталған. Экспортқа арналған тауарларды декларациялау да жеңілдетілген. Алдағы уақытта интернет арқылы сатып алынатын пошта құжаттары немесе сәлемдемелер көтерме рәсімделуі мүмкін. Енді пошта құжаттары декларация ретінде танылады. Электронды сауда өте қарқынды дамып келеді және барынша тиімді сектор саналады, – деді Р.Дәленов.
Министрліктің мәліметінше, елімізде тұтынушылардың құқығын қорғау институты күшейтілуде. Электронды саудадағы сатып алушы кәдімгі саудадағыдай қорғалады. Соның нәтижесінде былтыр оның бөлшек саудадағы үлесі 1,9-дан 2,9 пайызға немесе 92 млрд теңгеге ұлғайыпты.
Осы жиыннан кейін Орталық коммуникациялар қызметінде баспасөз конференциясы өтті. Ұлттық экономика министрі баспасөз мәслихатында ауылдарды дамытуға қатысты «Дипломмен ауылға!» бағдарламасына деген сұраныс жыл сайын артып келе жатқандығын мәлімдеді.
Біздің министрлік «Дипломмен ауылға!» бағдарламасының әкімшісі болып табылады. Жыл сайын осы бағдарлама арқылы 5 мың азамат көмек алады, деді министр.
Р.Дәленовтің айтуынша, бағдарламаға қатысуға өтініш жиі келіп жатыр. Соған сәйкес, биылғы жылы бюджет қаражаты кепілге қойылып, 5 мыңға жуық адам «Дипломмен ауылға!» бағдарламасын пайдалана алады.
Министр алдағы халық санағына да тоқталып, науқанда пайдаланылатын планшеттер мектептерге берілетіндігін жеткізді.
– Халық санағы келесі жылы болады, оған жалпы сомасы 9 млрд теңге жұмсау жоспарлануда. Егер 10 жыл бұрынғы халық санағымен салыстырар болсақ, шығыстар сомасы біршама төмен. Негізгі қаражат ақпараттық жүйеге және құрал-жабдықтар мен санақты өткізуге қажетті планшеттер сатып алуға жұмсалады. Қағаз сатып алынбайды. Сатып алынса да өте аз, бланкінің өзі электронды түрде болады, – деді ол.
Осы ретте министр санақ жүргізуге алынатын планшеттер кімдерге берілетініне тағы да тоқталды. «Планшеттер комитет (Статистика комитеті) жұмысына пайдалануға беріледі. Сонымен қатар олардың басым бөлігі Білім және ғылым министрлігі жүйесіне, яғни мектептерге беріледі. Сондықтан санақ жүргізуге сатып алынатын құрал-жабдықтар кейін де кәдеге жарайды», деді министр.
