ЕКПА-ның 26 маусым күнгі аталған шешіміне бірінші кезекте Украина тарапы келіспейтіндіктерін білдірді. Ассамблея сессиясынан Киев өкілдерінің шығып кетуі арқылы жасалған бұл қарсылық әрекетіне ертесіне алты мемлекет – Эстония, Грузия, Латвия, Литва, Польша және Словакия қосылды. Бұл елдердің делегаттары да осы күндері өткен ЕКПА сессиясын тастап шыққан.
Тарқата айтар болсақ, 2014 жылы Қырым оккупациясынан кейін Ресей делегациясы ЕКПА сессияларында дауыс беру құқығынан айырылған еді. Содан кейін Ресей өкілдеріне ЕКПА-дағы басшылық лауазымдарға ие болуға және мониторинг миссияларына қатысудан тыйым салынған-ды. Ресей делегациясы бұған жауап ретінде ЕКПА сессияларына қатысудан бас тартса, осыдан екі жыл бұрын Мәскеу Еуропа Кеңесі бюджетіне жарна төлеуді тоқтатқан.
Жалпы, 2015 жылы Ассамблея Ресей делегациясының өкілеттігін қалпына келтіру мәселесін екі рет қараған. Бірақ талқылаулар нәтижесі Мәскеудің пайдасына шешілмеді. Ал 2018 жылдың аяғында Ресей делегациясы ЕКПА-ның отырыстарында дауыс беру құқығынан айыруға тыйым салатын ережелерге түзетулер енгізілгеннен кейін қайта оралуға мүмкіндік беретін жағдайды ұсынды. 2019 жылы ЕКПА-ның Регламенттік комитеті Ресейге маусым сессиясына қатысуға өкілеттік беретін шешім шығарған.
Міне, енді ЕКПА бес жылдық үзілістен кейін Ресей делегациясының өкілеттігін толық қалпына келтіретін қарар қабылдап отыр (Құжаттың қабылдануын делегаттардың 116-сы жақтаса, 62-сі қарсылық білдірген, ал 15-і қалыс қалған).
Қабылданған құжатта ЕКПА Мәскеуді 2014 және 2015 жылдарға арналған шешімдерге енгізілген барлық ұсыныстарды орындауға үндеген. Қарарда Ресей делегациясының Ассамблеяға қарасты Мониторинг және басқа да барлық комитеттерімен ынтымақтастыққа кедергісіз қайта оралуы және өз міндеттемелерін орындау мақсатында сындарлы диалог жүргізуі қажеттігі де айтылған. Бұдан басқа, Ассамблея Ресей билігін өткен жылдың қараша айында шекараны бұзды деген айыппен ұсталған украиналық 24 матросты босатуға және Еуропа Кеңесінің бюджетіне тиісті барлық жарналарды тез арада төлеуге шақырды.
ЕКПА-ның Мәскеумен түсіністік тауып, Ресей делегациясының аталған органдағы барлық құқығын толық қалпына келтіру тұрғысындағы қадамына алғашқылардың бірі болып Украина делегациясы үзілді-кесілді қарсы болып отыр. Жоғарыда айтқанымыздай, әлгі қарар қабылданғаннан кейін бірден украиналық делегация сессия өтіп жатқан жайды тастап кетті. Украина өкілі Алексей Гончаренконың айтуынша, Киев делегациясы ЕКПА-ның маусым айындағы сессиясына қатысудан бас тартады.
Украина делегациясының басшысы Владимир Арьев ЕКПА-ның ресейлік делегация жөніндегі қарары халықтың Еуропа Кеңесіне деген сенімін әлсірететінін меңзей келіп: «Біз Ассамблеяның келесі сессиясындағы бірлескен іс-қимылымыз жөнінде парламент және үкіметпен кеңесу үшін үйімізге ораламыз», деп мәлімдеді.
Соңғы ақпараттарға қарағанда, жоғарыда аталған жеті елдің өкілдері өз парламенттеріне ЕКПА-дағы ұлттық делегацияларының Ассамблеядан жыл соңына дейін кетуі жөнінде ұсыныс жасамақ.
Қорыта айтқанда, аталған түйткілді шешу ЕКПА-ның жаңадан сайланған басшылығына біршама сын болып тұр.
