– Студенттер қолөнер байқауына «Атқа міну мәдениеті», «Ұлы даладағы ежелгі металлургия», «Аңдар стилі», «Алтын адам», «Түркі әлемінің бесігі», «Ұлы Жібек жолы», «Қазақстан – алма мен қызғалдақтың Отаны» атты түрлі инсталляцияларды жасап әкелді, – дейді басқарманың техникалық және кәсіптік білім беру бөлімінің әдіскері Мира Шыңғысова.
Сөйтіп «Ұрпақтар сабақтастығы» аталымында Техникалық сервис колледжінде дәнекерлеу ісі мамандығы бойынша оқитын 3-курс студенті Александр Трунов жеңімпаз атанды.
Колледж директоры Әнуарбек Ахметшаиховтың айтуынша, осы оқу орнында Александр сияқты талапты, қолдарынан іс келетін 300-ден аса ауыл, қала жастары білім алуда. Түлектер өңірдегі кәсіпорындарда еңбек етеді. Барлық кәсіпорындармен Дуальды оқыту бойынша келісімшарттар жасалған.
Байқауға қатысу үшін Александр өндірістік оқыту шеберлері Александр Николаев, Бейсенби Әбілхасановтың жетекшілігімен металл қалдықтарынан тұлпар жасап шығыпты.
Колледж алдында тұрған тұлпардың биіктігі 1 метр.
– Тұлпарды жасауға екі аптадай уақыт кетті. Жылқы пішінін құрастыру және көлем беру үшін түрлі диаметрлі сым қолдандық. Конструкция мен аяқ-қолдың қаттылығы үшін шаршы құбыр пайдаланылды. Жобаның беті тиісті форма берілген табақ темір жолақтарынан жасалған, –дейді Александр.
Ал «Креативті жоба» жүлдесін металл қалдықтарынан биіктігі 60 сантиметр киіз үй жасаған Монтаждау колледжінің студенті Юрий Тутаев иеленді.
Жүлдегерлер мен жеңімпаз атанған 6 қолөнерші студенттерге дипломдар табыс етілді.
ПАВЛОДАР
