Экспедиция бағыты еркіндікке жіберілген бүркіттер мекендейтін Алматы облысының аумағындағы Арқарлы мен Малайсары, Үлкен және Кіші Бұғыты, Сөгеті тауларын, Торайғыр мен Шарынның жоғарғы бөлігін қамтыды.
Есеп бойынша бұл аумақта бүгінгі таңда 36 бүркіт бар екен. Мамандар 14 тастүлек пен мұзбалақты және 11 жұпты тіркеген.
– Бірінші кезеңде Жоңғар Алатауының сілемдері зерттелді. Сапарымыз басталғаннан кейінгі бірнеше күн ішінде екі бүркіт жұбын анықтадық. Екінші кезеңде Іле Алатауы аумағын және алты жыл бойы бүркіттер еркіндікке жіберілген Алматы облысының жерлерін қарап шықтық. Тексерілген телімдерде біз тастүлектерді де, ұя салатын бүркіттерді де кездестірдік, – дейді топ жетекшісі, орнитолог Сергей Шмыгалев.
Экспедиция Қазақстанда 2012 жылы қолға алынған «Үлесіңді қос. Табиғатты аман сақтап қал» атты «Эфес Қазақстан» компаниясы жобасының аралық қорытындысын шығарып отыр. Осы аралықта «Сұңқар» тәлімбағында 25 бүркіт балапаны өсіріліп, табиғат аясына жіберілді.
Қазақстан аумағында мекендейтін бүркіттердің санағы соңғы рет 7 жыл бұрын есептелген екен. Есептеу нәтижесі мен орнитологтердің бағалауынша 2012 жылы бүркіттердің популяциясы азайған, Алматы облысының Үлкен және Кіші Бұғыты аймағында бар-жоғы 4-5 жұп қана қалған болатын.
– Көп жыл бойғы еңбегімізден осындай тамаша нәтиже шыққанына аса қуаныштымыз. 2012 жылмен салыстырғанда қазір ұя салатын бүркіт жұптарының бірнеше есе өскені анықталып отыр. Қазақстанның мемлекеттік байрағында бейнеленген ұлттық нышанды сақтап қалу – біздің компанияның корпоративтік әлеуметтік жауапкершілік саласындағы басым міндеттерінің бірі, – дейді «Эфес Қазақстан» АҚ корпоративтік қатынастар департаментінің директоры Шыңғыс Қаскеев.
Бүркіттерді қорғауға арналған бағдарлама әрі қарай да жүзеге асырыла бермек.
АЛМАТЫ
