17 секторда қызу жұмыс басталды

Өткен аптада Индустрия және инфра­құрылымдық даму министр­лігі­нің Құрылыс және тұрғын үй-коммуналдық шаруашылық істері комитетінің бірінші вице-министрі Қайырбек Өскенбаев бастаған жұ­мыс тобы 17 сектор бойынша тех­ни­калық тексеру жүргізіп, Арыс қаласында үйлердің, ғимараттар мен құрылыстардың зақымдану дәрежесін қағазға түсірген болатын. Арнайы комиссия қаладағы барлық үйлердің 85 пайызы жөндеуді талап ететінін анықтады. Осылайша, 752 жұмысшының қатысуымен 80-нен астам құрылыс компания­сы шілденің шіліңгір ыстығына қарамай, жұмысты бастап кетті.

Бүгінгі таңда шаһардағы бүлінген 247 жеке үй жөнделіп жатыр. 17 сектор бойынша алғаш болып Жамбыл, Қарағанды облысының құрылысшылар тобы жұмысқа қызу кірісті. Алдағы мақсат – бір ай ішінде ойраны шыққан ортаны ретке келтіріп, тұрғындарды біржолата қоныстандыру. Арыстың тамырына қайта қан жүгірту.

Осы мақсатты жүйелі жүзеге асыру үшін кеше Түркістан облысы­ның әкімі Өмірзақ Шөкеев­тің қаты­суымен Арыс қаласында апталық аппарат мәжілісі өтті.

«Халықтың мұң-мұқтажын жедел шешуіміз керек», деп сөз бас­таған Өмірзақ Естайұлы қысқа мер­зімде қаланы қалпына келтіру, тұр­ғындарға жағдай жасау бағы­тын­дағы барлық мәселені талқылады. Әрі осы жауапты міндетті отаншыл­дықпен, жанашырлықпен атқару керектігін айтты.

«Арыста 1 ай болып, құрылысты күнде басында тұрып қадағалаймын. Егер қай аудан ұйымдастыра алмаса, жауаптысын жұмыстан босатамын. Ал жауапты облыстар мен қала­лар салғырттық танытса, Үкімет бас­шы­сына мәлімдеймін. Халықтың мұқ­тажын жедел шешуіміз керек», деді әкім 17 сектордың жұмысын жандандыру жөнінде тапсырма беріп.

Әрбір сектордың жұмысын өңір әкімдерінің және аудан, қала әкім­дерінің орынбасарлары және Арыс қаласынан бір жауапты өкіл, жалпы саны 51 адам үйлестіреді. Жеке-жеке штаб құрып, үйлердің құрылы­сы, гуманитарлық көмек тарату, қауіпсіздікті сақтау, қаланы тазарту, тұрғындарды ақпараттандыру және өзге де мәселелер бойынша күн са­йын мәлімет беріп отырады.

Аппарат мәжілісінде Атырау, Қарағанды, Жамбыл, Маңғыстау, ШҚО облыстары және Нұр-Сұлтан қаласы әкімінің орынбасарлары мен жауап­ты өкілдерінің мәліметтері тың­далды. «Самұрық-Қазына» әл-ауқат қоры мен «Атамекен» ұлттық кәсіп­­керлер палатасының жауапты өкіл­дері де өздеріне тапсырылған жұмыс­тардың барысын баяндады. Аудан әкімінің орынбасарлары да есеп берді.

Бүгінде Арыс қаласындағы үй­лерді тексеру, құрылыс нысан­дары­ның жобалық-сметалық құнын есептеу жұмыстары жүргізіліп жатыр. Кейбір үйлердің терезелері ауыс­тырыла бастаған. Барлық сектор бойынша үйлерді тексеру, акт толтыру жұмыстары аяқталуға жақын. Мердігерлер анықталып, құрылыс бригадалары жасақталған.

Облыс әкімі Өмірзақ Шөкеев қаладағы көпқабатты үйлердің шатырлары, сыртқы көрінісі жинақы әрі біркелкі болуы керектігін ес­кертті. Азық-түлік үлестіру және өзге де жұмыстарды ұйымдастыруға жер­­гі­лікті белсенді тұрғындарды тар­ту­ды тапсырды. Сонымен бірге қа­л­а­ны ауыз сумен, электр қуаты­мен үздіксіз қамту, балаларды демалыс орындарына жіберу, өрт қауіп­сіздігін сақтау, атаулы әлеуметтік көмектерді уақтылы аудару мәсе­лелері де талқыланып, нақты жос­пар­лар жасалды.

Арыстағы құры­лыс жұмыс­тары­ның басталуына орай қажетті материал­дардың бағасы өсе баста­ғаны байқалады. Аталған жағ­дай­­дың алдын алу үшін облыс әкімі­нің орынбасары Мейіржан Мыр­залиевтің төрағалығымен баға­ны ұстап тұру үшін кәсіпкерлер мен базар басшыларының басын қосқан жиын өтті. Нәтижесінде екіжақты меморандумға қол қойылды.

Бүгінгі таңда Түркістан облы­сын­да құрылыс материалдарын өн­діретін 40-тан аса кәсіпорын жұ­мыс істейді. Аталған кәсіпорын­дар негізінен темір-бетон бұйым­да­рын, инертті материалдарды, би­тум, әк және цемент өндіреді. Құры­лыс материалдарының 36 позиция­сы бойынша талдау жүргізілді. Олар негізінен инертті материалдар, темір-бетон бұйымдар, цемент, арматура, бұрыш, швеллер, арқа­лық­тар. Материалдардың 15 пози­циясын, инертті материалдарды, күй­­дірілген кірпіштерді, тауарлық бе­тон­ды, битум, цемент, электр ка­бе­лін, модульдік қазандарды неме­се қазандықтарды және жиһаз­ды Түр­кі­стан облысының кәсіп­орын­дары 100 пайыз қамтамасыз ете алады.

«Қазақстан Республикасы­ның Тұңғыш Президенті – Елбасы Н.Ә.Назарбаевтың Түркістанды түркі әлемінің рухани орталығына айналдыру жөніндегі тапсырмасына орай қазіргі таңда облыс көлемінде жұмыс жүргізіліп жатқаны жұртшы­лық­қа аян. Осы аталған тапсырманы орындау үшін Түркістан облысы әкім­дігі кәсіпкерлермен кездесіп отыр», деді М.Мырзалиев.

Кездесу нәтижесінде, облыс­та­ғы құрылыс материалдарын шы­ға­ратын кәсіпорын басшылары бағаны көтермеуге уәде етті. Құрылыс ком­па­ния­­лары өз кезегінде, жергі­лікті қам­­­­тудың үлесін арттыру үшін құ­ры­­­­лысқа жергілікті құрылыс мате­риал­­дарын шығаратын кәсіп­орын­дар­дың өнімдерін пайдаланатынын жеткізді.

Арыс – Түркістан