Байқауға биыл 66 үкіметтік емес ұйымнан 91 өтініш түскен. Жәрмеңкеге түскен шағын және жергілікті қоғамдастық проблемаларын шешуге бағытталған жобалар байқауы кәдімгі дуылдаған бәйге іспеттес. Келушілер де, комиссия мүшелері де жобаларда көтерілген мәселелердің өзектілігін таразыға салады. Көтерілген мәселенің әлеуметтік өзектілігі өткір болған сайын, жеңіс мәресі де жақындай түседі. Сараптау комиссиясы биыл шағын жобалардан 7 аталым бойынша 7 жұмысты таңдап алып, олардың әрқайсысына 200 мың теңгенің сертификатын табыс етті.
Жоба шағын болғанымен, маңыздылығы жөнінен салмағы жеңіл емес. «Еңбек – қоғам негізі» аталымы бойынша Меңдіғара ауданындағы «Ескерткіш шырақшылары» бастамашы тобының «Жұмысшы мамандықтарының мәртебесін көтеру және еңбек әулеттерін насихаттау» жобасы жеңімпаз атанды. Мәселенің маңыздылығын жобаның аты-ақ айтып тұр. Сол сияқты «Жергілікті өзін өзі басқару және жергілікті қоғамдастықтар», «Шекарасыз әлем», «Бүгінгі бақытты балалық – ертеңгі мықты Қазақстан», «Адам капиталы – жаңғырту негізі», «Ақылды технологиялар», «Мықты жастар – мықты ел» аталымдары бойынша сертификатқа ие болған жобалардың барлығы да демеуді, қаржыландыруды қажет ететін өткір проблемаларды ортаға салған.
Әлеуметтік мәселелерді жергілікті қоғамдастықтармен бірлесіп шешуді мақсат еткен 4 жоба таңдап алынып, олардың әрқайсысына 500 мың теңгенің сертификаты табысталды. Солардың бірі Ұзынкөл ауданындағы «Ұзынкөл ауданы жастары» қоғамдық бірлестігіне мүше бастамашы топ көтерген «Қанатты доп» жобасы ауылдағы мектеп оқушылары тәрбиесіне қажетті өткір мәселені қозғайды. Ауыл мектебінің спорт алаңы жоқ. Аудан орталығындағы №2 Ұзынкөл орта мектебінің 242 оқушысы, 1 аула клубы мен балалардың 4 спорт секциясы спорт алаңына зәру. Оқушылардың денешынықтыру сабағы көшеде өтеді. Ал спорт алаңын салу қаржыға келіп тіреледі. Жергілікті атқару органдарына қаратпай-ақ, мұны «Ұзынкөл жастары» қоғамдық бірлестігі өздері шешуді қолға алыпты. Осы мектептегі денешынықтыру пәнінің мұғалімі Алмас Оспанов жобасын әлеуметтік бастамалар мен жобалар жәрмеңкесіне ұсынып көруге тәуекел етті. Ол ұтқан қаржыға бастапқы құрылыс материалдарын алса, қалған жұмысқа аудандағы шаруа қожалықтары көмек беруге уәде етті. А.Оспановтың жолы болды, жәрмеңкеде 500 мың теңгенің сертификатын ұтты.
– Жеті шаруашылық көмек береміз деп отыр. Әлі қиыршық тас, жұмыс күші, техникалар керек. Оған көмек беретіндер бар. Алдағы оқу жылы мектептің өзінің спорт алаңы болады, – дейді А.Оспанов.
Жәрмеңкеге тек әлеуметтік бастамалар ғана емес, бизнес-қоғамдастықтар да қатысты. Онда «Милх» сүт зауыты Қостанай қаласындағы «Экопатруль» бастамашы тобының «Гүлдене бер, туған жерім!» жобасын 200 мың теңгемен қаржыландырды. Сонымен қатар биыл Қостанай облысы бойынша «ГРиН» Азаматтық альянсы» қоғамдық қоры ауылдағы үкіметтік емес ұйымдар әлеуетін күшейту мақсатында 8 жобаны қаржыландырып, олардың әрқайсысына 500 мың теңгенің сертификатын тапсырды.
– Жәрмеңке бастамашы топтардың үкіметтік емес ұйымдар деңгейіне дейін өсуіне мүмкіндік береді. Оның қалалар мен аудандарда жақсы мысалдары көп. Бастамашы топ жәрмеңкеге қатысқан сайын өздерінің пікірлестерін табады, қоғамдастыққа бірігеді. Аутизммен ауыратын балалар мен мүгедек балалар аналары бірігіп, жәрмеңкеге өте өзекті мәселелер жобаларын ұсынып отырды. Олар жәрмеңкеден ұтқан қаржы арқылы кабинеттер ашты, оны құралдармен жабдықтады, солай өз аяғынан тұрып кетті, – дейді облыс бойынша «ГРиН» Азаматтық альянсы» қоғамдық қорының төрайымы Динара Өтебаева.
Әлеуметтік бастамалар мен жобалар жәрмеңкесі арқылы игілікті істердің жүзеге асып жатқанын жеңімпаздарға облыс әкімі атынан сертификаттар тапсырған облыс әкімінің орынбасары Марат Жүндібаев та жалғастырды.
– Қоғамдағы әлеуметтік мәселелерді шешуде үкіметтік емес ұйымдардың маңызы арта түсті. Төрт-бес жылда бұл іске бизнес қоғамдастықтардың белсенділігі артып келеді. Соңғы жәрмеңкедегі жобаларға он бизнес ұйымы қатысып, әлеуметтік мәселелердің шешімін табуына қолдау білдірді, – деді Марат Қонысбайұлы. Биыл 516 миллион теңгеге 312 жоба жүзеге асады. Жобаларды қаржыландыру осыдан үш жыл бұрынғы уақытқа қарағанда үш есе көбейді. Азаматтық қоғамның дамуы осылай істен көріне бастады.
ҚОСТАНАЙ
