Түсірілім жұмыстары Түркістан, Алматы және Ыстанбұл қалаларында өткен. Фильмде аққан жұлдыздай жарқ етіп, аз ғана ғұмыр кешкен спортшының өмірі мен спорттағы жетістігі суреттеледі. Туындының сюжеттік желісінде Бекзат Саттарханов өмірінің үш кезеңі қамтылады. 90-жылдардың басындағы қиын-қыстау кезеңге тап келген Бекзаттың балалығы көп қиындықтармен өтеді. Түркістан қаласындағы темір жолды бойлай орналасқан шағын ауылдың қарапайым тіршілігі бала Бекзаттың көзімен бейнеленеді. Оның арманы, намысқой бітімі әрбір сәтте сыналып отырады.
«Бұл бүкіл өмірі емес, өміріндегі бір кезең. Боксқа қалай келді, өмірінде қандай қызық оқиғалар болды. Бұл жобадағы ең бастысы – Сиднейдегі оқиға. Картинада осы мәселелер көтеріледі», дейді режиссері Мұрат Бидосов.
Кейіпкерлерді таңдағанда тек актерлік шеберлігі емес, спорттық дайындығы да ескерілген. Мәселен, басты рөл Бекзатты жас актер Самат Әзімқұлов ойнайды. Ол 2006-2007 жылдары кикбокстан жастар арасында екі рет Қазақстан чемпионы болған.
«Бұл бір адамның өмірі, бір адамның тағдыры. Жалпы, осы фильм арқылы Бекзат ағамызды қайта тірілтіп, артымыздан өсіп келе жатқан жастардың спортқа деген құлшынысын арттырсақ және титтей де болсын бір патриоттық сезім ұялата алсақ, арманымыздың орындалғаны деп білемін», дейді актер Самат Әзімқұлов. Ұйымдастырушылардың айтуынша, фильм жалпы прокатқа күзде шығады. Артынша «Хабар» арнасынан бірнеше сериядан тұратын телехикая көрсетілетін болады.
