Суретші Мұратбек Жоламан туралы жұбайы Гүлжамыш Бәкейқызы осылай еске алады. Абзал азаматының 33 жылға ғана жеткен қысқа ғұмырын қолының табы қалған әр картинасы жалғастыратындай көреді. «Тек 30 картина салып үлгерді. 100-ден астам суреті сұлба күйінде қалды», дейді. Кім біледі, мүмкін қолтаңбасы дара суретшінің аяқталмай қалған жұмыстарын ұрпақтары жалғастырар...
Ш.Сариев атындағы Атырау облыстық көркемсурет және қолданбалы сәндік өнер музейінде Қазақстан Суретшілер бірлестігінің мүшесі, белгілі суретші Мұратбек Жоламанның «Рухпен сырласу» атты көрмесі өтті. Шараға Қазақстан мен Қырғызстанның еңбек сіңірген қайраткері, композитор, суретші Ілия Жақанов, Қазақстанның еңбек сіңірген қайраткері, Мемлекеттік сыйлықтың лауреаты Ақұштап Бақтыгереева, Қазақстанның Суретшілер одағының төрағасы Өмірбек Жұбаниязов пен Мұратбек Жоламанның зайыбы Гүлжәміш Бәкейқызы қатысты.
Суретші Мұратбек Жоламанның жұмыстары Англия, Польша, Корея, Түркия елдеріндегі музейлерде сақтаулы. «Құлагер», «Еділ-Жайық», «Сарын», «Тұмар», «Қорқыттың теңізге келуі», «Қызғыш құс», «Аттиланың елесі» секілді басқа да картиналары суретшінің биік өресін, жоғары талғамы мен қалам қуатын анық аңғартады. Атыраулықтар көрмені бір ай бойы тамашалай алады.
АТЫРАУ
