Арыс қаласындағы жарылыстан зардап шеккендерге атыраулықтардың көмегі туралы айтылған бағдарлама «Atyraý radiosy»-ның жаңа студиясынан әуе толқынына тарады.
Бағдарламаның алғашқы қонағы болған облыс әкімі Нұрлан Ноғаев 80 жылдық тарихы бар облыстық телеарнаның заман талабына сай жабдықталып, көрермен көзайымына айналып отырғанын атап өтті.
Жергілікті радионың таралу аумағы бұған дейін 3 шақырым ғана болған еді. Іске қосылған кеңейтілген диапазонды 1000 киловаттық жаңа радиотаратқыштың арқасында атыраулықтар әуе толқынын жаңа сапада тыңдай алады. «Қазақстан-Атырау» телеарнасының басшысы Қанат Әуесбайдың айтуынша, радиотолқын енді 60 шақырымға дейін таралады. Мұнайлы аймақ тұрғындары 102.0 FM жиілігінде 17 сағат бойы «Atyraý radiosy»-ның хабарларын тыңдай алады.
