Өскемендік өлермен өндірісші
Жұма, 26 сәуір 2013 3:05
мемлекеттен екі миллиард теңге жымқырған
Жұмыртқадан жүн қырқатын кәсіпкер таяу жылдар ішінде мемлекеттің қазынасын 2 млрд. теңгеден астам қаржыға олқы түсіріп берген. Бұл туралы Шығыс Қазақстан облыстық прокуратурасының баспасөз қызметі хабарлады.
Жұма, 26 сәуір 2013 3:05
мемлекеттен екі миллиард теңге жымқырған
Жұмыртқадан жүн қырқатын кәсіпкер таяу жылдар ішінде мемлекеттің қазынасын 2 млрд. теңгеден астам қаржыға олқы түсіріп берген. Бұл туралы Шығыс Қазақстан облыстық прокуратурасының баспасөз қызметі хабарлады.
Бақылаушы органдардың мәліметіне қарағанда, «Предгорный элеваторы» акционерлік қоғамының басшысы А.Мерзлов бірнеше жылдың көлемінде қылмыстық жолмен мемлекетке тиесілі дәнді дақылдар қорын жымқырып келген.
Altaynews.kz тілшісі бармағын жалап үйреніп қалған бизнесменнің осы арқылы мемлекетті 2 млрд. теңгеден астам қаржыға тақырға отырғызып қойғанын жазады. Мамандар қалада нан өнімдері бағасының бірден күрт өсіп кетуіне осының негізгі түрткі болғанын да жоққа шығармайды…
Тергеу барысы анықтағандай, жоғарыда аталған компания мен «Азық-түлік келісім-шарт корпорациясы ұлттық компаниясы» акционерлік қоғамы арасында 2008 жылғы 3 қаңтарда-ақ келісім-шарт жасалып қойылған екен. Соның негізінде артынша Предгорный элеваторына үшінші класты 58 569 тонна астық шексіз мерзімге сақтап қоюға беріледі.
Алайда, арада біршама уақыт өткеннен кейін аталмыш дақыл қамбасының кенересі айтарлықтай төмен түсіп кеткені анық аңғарылады.
–Үстіміздегі жылғы наурыз айында облыстық прокуратураға Ауыл шаруашылығы министрлігі агроөнеркәсіптік кешеніндегі облыстық аумақтық инспекциясының бастығы А.Жақыпбаевтан «Предгорный элеваторы» АҚ қоймасында сақтаулы тұрған астықтың іс жүзіндегі көлемін анықтап беру жөнінде өтініш түсті, – деді осыған арналған брифингте Шығыс Қазақстан облысы прокурорының бірінші орынбасары Болат Шелекенов. – Ал прокуратура қызметкерлері өлшеп тексерудің нәтижесінде іс жүзінде 46 069 тонна көлеміндегі астықтың қолды болғанын анықтады. Осы арқылы мемлекетке 2 миллиард теңгеден артық залал келтірілгені белгілі болып отыр.
Прокуратура аталмыш факт бойынша биылғы 26 ақпанда қылмыстық іс қозғаған. Онда «Предгорный элеваторы» АҚ директоры А.Мерзловқа Қылмыстық кодекстің 176-бабы 4-тармағы бойынша айып тағылған. Бұл «өзіне сеніп тапсырылған өзгенің мүлкін иемдену және талан-таражға салу» дегенді білдіреді.
Қазіргі таңда қылмыстық іс бойынша тергеу амалдарын қаржы полициясы жүргізіп жатыр.
– Тергеу кезінде Мерзлов Алматыда болды. Бүгінде ол Шығыс Қазақстанға жеткізілді. Күдікті өзінің астық ұрлағаны жөніндегі кінәсін толық мойындады, – дейді Б.Шелекенов.
Тағы бір айтатын жәйт, прокуратура А.Мерзловтың өз айыбын мойындап отырғанына қарамастан, бұл қылмысқа мемлекеттік органдардың астықты бақылау мен сақтауға жауап беретін басқа да лауазымды тұлғаларының қатысы болуы мүмкін деп санайды.
– Сондықтан тағы да мұқият тексеру жүргізіліп, мемлекеттік органдардың осыған мүдделі тұлғаларының іс-әрекеттеріне баға берілетін болады, – деп түсіндірді мұны прокуратура өкілі. – Бухгалтериялық құжаттарға сәйкес, астықтың сыртқа шығарылғаны туралы мәліметтер сақталған. Ал Мерзловтың өзі бұл автокөлік арқылы жүзеге асырылды дегенді айтады. Бірақ, өздеріңіз ойлап көріңіздерші, орта есеппен әрбірі 15-20 тонна ғана тарта алатын КамАЗ көлігімен 43 000 тонна астықты сыртқа тасу үшін қанша мәшине және қанша күн керек болады? Бұл – оншалықты ақылға сыймайтын нәрсе. Демек, мұнда әзірге біз білмейтін жасырын жатқан басқа да қылмыстардың іздері болуы кәдік.
Сонымен бірге, қолда бар мәліметтер ұрланған астықтың Қазақстан аумағында жаратылғанын айғақтайды. Қазір қылмыстық істің қозғалуына байланысты Мерзловтың мүлкі мен шотына, сондай-ақ «Предгорный элеваторы» акционерлік қоғамының өндірістік базасына тыйым салынды.
Руслан ИГІЛІК.
