Табиғи газ тұтынуға енді аймақтың шеткері аумағының бірі Ұйғыр ауданы тұрғындары да қол жеткізді. Жақында Шонжы ауылында ауданды көгілдір отынмен қамтамасыз ететін газ тарату қондырғысының ашылуы өтті. Орталықтандырылған жаңа газ құбырымен алғашқы табиғи көгілдір отынды жіберу салтанатына арнайы келген облыс әкімі Амандық Баталов қуанышты сәтке куә болған барша аудан тұрғындарын құттықтады.
– Жетісу өңірінде, оның ішінде Талдықорған аймағында табиғи газ тұтыну – бұрын-соңды болмаған жағдай. Біз мемлекеттің қолдауы арқасында қазір облыстағы әр үйдің көгілдір отынға қосылуына жұмыс істеп жатырмыз. Алыс аудандардан алғашқы болып Қарадалы өңірі газ желісіне қосылды. Ендігі бағыт – Кеген мен Райымбек аудандары. Осы мақсаттан айнымай, Талдықорғанға жеткен газ желісін Ақсу, Сарқан, Алакөл аудандарына дейін тартуды жалғастырамыз. Бұған мүмкіндік бар, – деген облыс әкімі Амандық Баталов елімізді газдандыруға қатысты Елбасы жүктеген міндеттің орындалып жатқанын айтты.
Шонжы ауылындағы газ тарату стансасының құрылысы әлі толық аяқталған жоқ. Оған «Шарын» автоматтандырылған газ тарату стансасы, Шонжы ауылына дейінгі 9,5 шақырымдық жоғары қысымды газ құбыры және 46 шақырымдық орташа қысымды газ тарату жүйесінің құрылысы кіреді. Қазіргі таңда ауылішілік жүйелердің құрылыс-монтаждау жұмыстарының II кезеңінің құрылысы жүргізілуде. Жұмыстарды 2019-2020 жылдардың жылыту маусымының басталуына дейін аяқтау жоспарлануда.
Алғашқы кезеңді іске қосу барысында-ақ ауылдағы 42 абономент көгілдір отынға бір күнде қосылған, 150 үйдің өтініші кезекте тұр. Бұл өңірдегі көгілдір отынға деген сұраныстың жоғары екенін көрсетеді. Жалпы, бір ғана Шонжы ауылы бойынша 5 абономент газ желісіне қосылуға дайын отыр екен.
