– Арыс қаласының іргелес аумағында және тікелей арсенал аумағында жергілікті тұрғындардың қоңырау шалуы үшін 42 мобильдік топ құрылды, – деді Қорғаныс министрінің орынбасары.
Оның айтуына қарағанда, қазіргі уақытта оқ-дәрі қалдықтарын жою жұмыстары басталған.
– Қарулы Күштердің инженерлік әскерлер бөлімшелері таңғы 9.00-ден 18.00-ге дейін жұмыс істейді. Тиісті құжаттарға сәйкес тасымалдауға келмейтін оқ-дәрілердің қалдықтары арсенал аумағында жойылады, ал қалғаны Арыс қаласынан солтүстікке қарай 60 шақырымдай қашықтыққа шығарылып, арнайы жабдықталған полигонда жойылады, – деді Т.Дәндібаев.
Министрлік өкілінің айтуынша, оқ-дәрілердің қалдықтарын жою барысында жарылыстың дүңкілдеген дауысы шығуы мүмкін, бірақ ол дыбысқа алаңдау мен үрейленуге негіз жоқ.
– Қазақстан Президенті – Қарулы Күштердің Жоғарғы Бас қолбасшысының тапсырмасының негізінде әскери бөлімді де көшіру жұмыстары басталып кетті, – деді генерал-майор.
Министрлік өкілі қаланы тазалау, оқ-дәрілердің бөлшектерін залалсыздандыру, әскери бөлімді көшіру жұмыстары тікелей Қорғаныс министрінің бақылауында екенін жеткізді.
Сонымен қатар министрдің орынбасары қазір қала аумағында саперлар бөлімшесі жұмыс істеп жатқанын, ұшқышсыз басқарылатын ұшу аппараттарының жіберілгенін, сол арқылы арсенал орналасқан және оған жапсарлас аумақ бақылауға алынғанын баяндады. Оған қоса, қару-жарақ бөлшектеріне кезіккен адамдардың хабарламасын қабылдау мақсатында арнайы инженерлік-саперлік бекеттер құрылған.
Қорғаныс министрінің орынбасары әскери қызметшілер үйлеріне оралған Арыс қаласы тұрғындарына көмек беріп жатқанын мәлімдеді.
