– Қазіргі заманғы медицина көз ауруларын бірнеше минут ішінде арнайы жабдықтың көмегімен тексеріп бере алады. Бірақ көз дәрігеріне сезімталдық пен жанашырлық, көзі ауырған адамға көңіл бөлу, жан жылуы қажет, – дейді Қасымхан.
Расында, бұл күндері аурухананың офтальмология бөлімшесінің дәрігерлері ең заманауи жабдықтармен, атап айтқанда офтальмологиялық коагуляциялаушы лазер когерентті томограф ультрадыбыстық операциялық жүйе арқылы емдеу шараларын жүргізеді.
– Мысалы, INFINITI VISION офтальмологиялық жүйесін енгізу жоғары мамандандырылған медициналық трабекулоэктомия, көз алмасының энуклеациясына көмек көрсетуге мүмкіндік берді. Сондай-ақ стационарда емделу уақытын қысқартады, көздің тез жазылуына әсер етеді, – дейді кейіпкеріміз.
Бүгінде көздің көру деңгейінің нашарлауы, ұяшықтың бұлдырауы балалармен жастар арасында жиі кездесе бастады. Бұрын бұл сырқатпен дәрігерлерге қарттар ғана жүгінетін еді. Қазір офтальмологиялық орталыққа күніне 100-ге жуық адам келеді. Жылына 4 мыңнан астам ота жасалады. Орталықта көру қабатын лазер арқылы емдеу мүмкіндігі бар. Жаңа лазерлі аппараттарды қолданғаннан бері офтальмология бөлімшесінде науқастардың кезегі азайды.
– Көз қысымын тексеріп, хирургиялық оталар жасап, көз тамырларын қалпына келтіреміз. Ағза ауруларын көз арқылы анықтауға болады. Көзге күрделі операциялар да жасалады. Ота түрлері жоғары технологиялы құрылғылар арқылы дене жарақатынсыз жасалады, – дейді Қ.Тілеубаев.
Бұрын тіркеуге тұрғаннан кейін жауап алу үшін жарты жыл күтетін. Ал қазір қалаған дәрігерінен 2-3 аптаның ішінде жауап ала алады. Кепілдендірілген тегін медициналық көмек аясында емханалардың анықтамасымен келген науқастарға тегін ота жасалады.
Сонымен қатар Міндетті әлеуметтік медициналық сақтандыру жүйесі аясында офтальмологиялық қызмет түрлері енді сақтандырылған адамдарға қолжетімді болмақ. Ал, скринингтік тексерулерге келетін болсақ, офтолмолог дәрігерлер 40 жастан асқандарға көз қысымын тексертуге кеңес береді.
Аустралиялық «Танго» лазерлік қондырғысы екі бағыт бойынша емдеуге мүмкіндік береді. Олардың бірі – глаукоманы емдеу, екіншісі – қайталама катарактаны емдеу.
Ал, компьютерлік көру синдромы – уақытының басым көпшілігін компьютер экранының алдында өткізетін адамдардың көру қабілетінің спецификалық төмендеуі. Астенопия (көру қабілетінің шаршауы) дегеніміз – көзге салмақ түсіре отырып, жұмыс істегеннен кейін көздің айналасында түйіліп ауыру, күйдіру, «құм» түсіп кеткендей болу, көз жанарының айналасындағы ақтың қызаруы, қараған нәрсенің бұлыңғыр болып көрінуі тәрізді жағымсыз әсерлердің пайда болуына апарып соқтыратын функционалдық ауытқушылықтар.
Жалпы, ем алушылардың арасында жастар басым, көбінесе миопия ауруы кездеседі. Олай болса, әрбір ата-ана балаларының болашағына немқұрайлы қарамағаны дұрыс.
Біз әңгімелеп отырған Қасымхан Тілеубаев облыстық ауруханада 20 жылға таяу уақыт қызмет етіп келеді. Ал, Қасымханның әкесі Абылайхан Тілеубаев та офтальмология орталығында дәрігер-ординатор. Анасы Ғалия неврология саласының маманы.
Қасымхан да әке-шешесі оқып білім алған Семей медициналық иниституын 1999 жылы бітірді. Жолдасы, сүйікті жары Шайзат та дәрігер.
Біздің «көзге ақ түсу деген не?» деген сауалымызға ол былай деп жауап берді:
– Көзге ақтың түсуі – катаракта. Көз бұршағы бұлдырап, қарауытып, ағарады. Көзді шел басқан кезінде сәуленің көз бұршағына өтуі қиындайды. Көздің көру қабілеті кемиді. Катаракта екі түрлі болып келеді: туа біткен және жүре пайда болатын. Жүре пайда болған катаракта кейде 40-50 жастан кейін болады, бірте-бірте үдей түсіп, көз бұршағы бұлыңғыр болып, перде жабылып қалады. Бастапқы белгісі адамның көзінің алдында бір нәрсе тұрғандай сезіледі. Ота арқылы емдейді, – деп жауап берді дәрігер.
