– Облыс өңірінде Би-ағаның атымен 22 көше, 4 мектеп, 1 ауыл, 1 станса және 1 музей аталады. Бейімбет Майлиннің туғанына 125 жыл толуы қарсаңында биыл 24 маусымда Президент Қасым-Жомарт Тоқаев Таран ауданын Бейімбет Майлин есімімен атау туралы Жарлыққа қол қойды. Би-ағаның мерейтойына орай облыста көптеген шара белгіленген, мүшәйра сол тойдың басы деп біліңіздер, – деді Гүлжан Ермашқызы.
Өткен ғасырдың басындағы қазақ әдебиетінде Би-аға қалам тартпаған жанр кемде-кем. Сондықтан Би-ағаның тойын жыр бәйгесінің бастауы деу заңды да еді. Мүшәйраға түскен 30 жұмыстан іріктеліп, Жамбыл, Ақтөбе, Алматы, Батыс Қазақстан, Павлодар, Түркістан, Қостанай облыстарынан, Нұр-Сұлтан қаласынан 12 ақын қатысты.
Жыр десе ішер асын жерге қойып, сусап отыратын қостанайлықтар он екі жас ақынның өлеңін тыңдады. Ақындар Ұлы дала перзенттері, Би-аға аңсаған тәуелсіздік, ұлттың ұлы мұралары мен мұраттарын өлең өрнегіне айналдыра біліпті. Жүйріктен жүйрік озу – бәйгенің салты. Жазушы Ғұмар Ахметчин бастаған қазылар алқасының шешімімен үшінші орынды Нұр-Сұлтан қаласынан келген Жұлдызай Ысқақоваға, екінші орынды ақтөбелік Гүлімай Қуанышеваға, бірінші орынды Рудный қаласынан қатысқан Ғалымкерей Кенжебозинге берді. Ал мүшәйраның бас жүлдесін Нұр-Сұлтан қаласынан келген ақын Әбілмәжін Серікбай жеңіп алды. Сонымен қатар мүшәйраға Лисаков қаласынан Бейімбет Майлин туралы өлеңін жолдаған 84 жастағы Мөр Тілеубаева қарияға да құрмет көрсетілді.
Бейімбет Майлиннің ұрпақтары, жиен немерелері Дәметер Сейітжанова, Салтанат Мұстафина мүшәйраның қонағы болды. Ақындар мен Би-ағаның немере, шөбере, шөпшектері оның кіндік қаны тамған Бейімбет ауданына, Жалшы ауылына барып, ата рухына тағзым етті. Мүшәйра соңында сөз алған жазушы Ғұмар Ахметчин Би-аға рухын ұлықтауда ескерілер мәселе де жоқ емес екенін айтты.
– Тәуелсіздік алған 28 жыл ішінде елімізге белгілі Би-ағаның шығармаларына қанық адамдардың барлығы да оның есімі Таран ауданына берілсе екен деген ниетте еді, оның қабыл болғанына шүкірлік етеміз. Қостанайда Бейімбет Майлиннің музейін ашу туралы хатқа бұдан біраз жыл бұрын халқымыздың ірі тұлғалары, зиялылары: Мұзафар Әлімбаев, Зейнолла Қабдолов, Әбдіжәміл Нұрпейісов, Серік Қирабаев, Тұрсынбек Кәкішев, Тұманбай Молдағалиев, Өмірзақ Сұлтанғазин, Кеңес Нұрпейісов, Герольд Бельгер, Шерияздан Елеукенов, Жұмағали Ысмағұлов, Ғаббас Қабышев қол қойған. Герольд ағамыз орыс тілінде жазған «Би-ағаның өмірі мен қызметі туралы» деген мақаласында: «Би ағаның туған жерінде, Қостанайда оның музейі жоқ. Ал Таран ауданындағы мен көрген музейді музей деп айту қиын. Кеш болмай тұрғанда әділеттілікті орнына келтіру біздің Президентіміз бастаған, Үкіметіміз жасап, қабылдаған «Мәдени мұра» бағдарламасының жүзеге асу көрінісінің бірі болар еді. Қостанайға музей керек, әйтпесе ол біздің тарихымызға, ұлттық рухани мұрамыз және қазақ халқының даңқты ұлдарының бірі Бейімбетке деген құрметтің жоқтығы болады» деп жазған екен. Герольд Бельгерден асырып айта алмаймыз. Би-ағаның биылғы мерейтойы жылы осы тілек жүзеге асса құба-құп болар еді, – деді Ғұмар Ғарифұлы.
Бұл кемнің орны толса, рухани дүниеміз де толыға бермек те.
ҚОСТАНАЙ
