– Сүйрік – бекіре тұқымдас тұщы су балығы. Ұзақ өмір сүреді. Салмағы 250-800 грамм ғана бұл балықты ұстау үшін арнайы рұқсат керек. Еліміздің «Қызыл кітабына» енгізілген ол Жайық, Ертіс, Тобыл өзендерінде кездеседі, – дейді инспекция маманы Нариман Қуанышұлы.
Мамандардың айтуынша, бекірелер сүйекті-шеміршекті болып, басқа балықтардан ішкі-сыртқы пішінімен ерекшеленеді. Халқымыз бұл балықтың қасиетін бағалап, сүйріктей сұлу дейтіні де содан. Денесі ұзынша, бес қатар сүйекті өсінділермен жабылған. Бір қатары арқасында, екеуі екі бүйірінде және екеуі құрсағында, осы қатарлардың ортасында ұсақ сүйекті түйіршектер мен тақтайшалар бар. Басы конус тәрізді созылған және тұмсығы күрек тәрізді. Төменгі жақта тісі жоқ.
Облыстық Орман шаруашылығы және жануарлар дүниесі аумақтық инспекциясының айтуынша, өңірде үш деңгейдегі балық аулауға арналған су қоймалары бар. Халықаралық мәртебесі бар Ертістен басқа 9 республикалық, жергілікті маңызға ие 265 су қоймасы тіркелген.
Биыл өңірде заңсыз балық аулаушыларға 800 мың теңгеден астам айыппұл салынып, 65 әкімшілік хаттама толтырылыпты. Ұсталғандардан 19 браконьерлік құрал тәркіленіп, 5 әкімшілік материал облыстың әкімшілік соттарына жіберілген.
Балық шаруашылығы мамандары мен инспекция жүргізген ихтиологиялық бақылаулардың нәтижесінде су қоймаларында балықтардың уылдырық шашуына қолайлы жағдайлар жасалған.
Павлодар
