Салалық алалау болмайды
Индустрия және инфрақұрылымдық даму вице-министрінің айтуынша, биыл жыл соңына дейін 2020-2025 жылдарға арналған индустрияландыру бағдарламасы бекітіледі.
– Елбасының тапсырмасының аясында жыл соңына дейін 2020-2025 жылдарға арналған индустрияландыру бағдарламасын бекітеміз. Индустриялық-инновациялық даму тұжырымдамасына енгізілген бұл бағдарлама өткен жылдың желтоқсан айында Үкіметтің қаулысымен бекітілді. Бағдарламаның мақсаты өңдеуші өнеркәсіптің халықаралық бәсекеге қабілеттілігін арттыру. Жалпы, индустриялық-инновациялық саясат жалғаса береді. Экспортқа бағдарланған кәсіпорындар мен еңбек өнімділігін арттыруға баса назар аударылады, – деді министр орынбасары.
Өз сөзінде вице-министр таяуда бекітілетін 2020-2025 жылдарға арналған индустрияландыру бағдарламасының негізгі ерекшеліктерін атады. Біріншіден, өңдеуші өнеркәсіптің барлық салаларындағы тиімді жұмыс істеп жатқан компанияларды қолдау үшін бағдарламадағы салалық басымдықтар алып тасталады. Екіншіден, бюджет қаражатына бақылауды күшейту және тиімді пайдалануын қадағалау үшін кәсіпорындарды қолдауда нақты көрсеткіштерге көңіл аударылмақ. Үшіншіден, кәсіпорындарды жаңғырту мен технологиялық дамытуға бағытталған қолданыстағы құралдар жетілдіріледі. Аманияз Ержановтың айтуынша, қазіргі таңда бағдарлама жобасы әзірленіп жатыр.
Жеңіл автокөлік өндірісі 41,5 %-ға ұлғайды
Вице-министрдің атап өткеніндей, автокөлік құрастыру саласы елдегі машина құрастыру саласының негізгі бағыты болып табылады. Бұл саланы дамыту арқылы экономиканың өзге де салалары мультипликативті түрде дамитыны анық. Сонымен қатар саланың қарқын алуы жаңа жұмыс орындарының ашылуына да тікелей ықпал етпек. Қазірдің өзінде бұл салада жұмыс істейтіндер саны 2 мыңның айналасында болса, өнеркәсіптің аралас салаларындағы жұмыс орындарының саны 7 мың адамға жетеді.
– Қазір Қазақстанда автокөліктің барлық түрлерін жинау бойынша өндіріс құрылды. 2018 жылдың қорытындысы бойынша машина жасау саласындағы автомобиль жасау үлесі 19,2 пайызды құрады. Ал 2019 жылдың қаңтар-мамыр айларында машина жасау саласындағы автокөлік шығару үлесі 25,4 пайызға дейін өсті. 2018 жылы жалпы құны 205 млрд теңге болатын 32 298 көлік құрастырылды. Машина жасау саласының нақты көлем индексінің көлемі 2018 жылы 114 пайызға жетті. Осы жылдың 5 айының қорытындысы бойынша жалпы құны 114 млрд теңгенің
16 921 көлігі шығарылды. Жеңіл автокөлік өндірісі 41,5 пайызға, автобус өндірісі 3,2 есеге, жүк автокөліктері өндірісі 35 пайызға, тіркемелер мен жартылай тіркемелер өндірісі 35 пайызға өсті, – деді министрдің орынбасары.
Электромобиль инфрақұрылымы салынуда
Баспасөз мәслихатында Аманияз Ержанов:
– Қазір барлық шетелдік компаниялар электрокөлік өндірісіне көңіл аударып жатыр. Бұл әлемдік тренд. Біз одан қалып қоймауымыз керек. Электромобиль құрастырумен айналысатын бірнеше қазақстандық компанияны атаған едім. Әзірге қазақстандық өндірушілер шығаратын электрокөліктердің құны Tesla көліктерінен 1,5 есе қымбат болып тұр, – дееді. Вице-министр бүгінде әлемде осы сала бойынша Tesla-ның көшбасшы екенін айта келіп, біздің автокөлік өндірушілеріміздің аталған көлікті зерттеп, өзіміздің өнімдердің құнын төмендету тәсілдерін ойластырып жатқанын тілге тиек етті.
– Tesla көліктерінің бағасы 28 мың АҚШ доллары шамасында. Отандық компаниялар электрокөліктерге қолданылатын батареяларды өз елімізде шығару үшін жұмыс істеп жатыр. Отандық ғылыми институттар да аталған батареяны Қазақстанда жасау жағын ойластыруда. Батареяны шығаруға қажетті шикізат бізде бар,– деді Аманияз Ержанов.
Министр орынбасарының айтуынша, сұраныс болған жағдайда отандық компаниялар электрокөлік шығаруға дайын көрінеді. Бұған дейін бірнеше автокөлік құрастырылып, сатылымға шығарылыпты. Қазір Нұр-Сұлтан, Алматы қалаларында және Нұр-Сұлтан-Щучье тас жолында электрокөлік инфрақұрылымы жасалып жатыр. Бүгінде елімізде шамамен 200 электрокөлік бар.
Бауыржан МҰҚАН,
«Egemen Qazaqstan»
