Шөл далада ыстық өтінде қалған аққулар сол маңайды мекен еткен шопан ауылына барса керек. Су берсе ішпей, әлсіреген, тіпті біреуін көлік қаққан аққулардың ауыр да аянышты халін аңғарған шопан дереу тиісті орындарға хабар береді.
Күннің ыстығын елемей құстарды құтқару үшін жолға шыққан инспекторлар он сағатқа жуық тоқтамастан жүріп отырып аққуларды Ақтау маңындағы Қаракөл өзеніне алып келді.
Маңғыстау облыстық орман шаруашылығы және жануарлар әлемі аймақтық инспекциясы басшысының орынбасары Ғаббас Досатовтың айтуынша, аққулар мекен аудару кезіндегі ауа райына байланысты Бейнеу ауданының Боранқұл ауылы маңына аялдап қалған болуы керек. Азықтың жоқтығы, күннің ыстықтығы сынды қолайсыз жағдайлар әлсіретіп жіберген. Алайда, шопанның қырағылығы мен инспекторлардың шұғыл әрекеті аққуларды қиын жағдайдан құтқарды.
200-ге жуық аққу мекен еткен Қаракөл өзеніне жеткізілген аққулар қазір өздерін жайлы сезінуде – азықтанып, әлденіп келеді. Енді Қаракөлдегі барлық құстармен бірге олар да инспекторлардың жіті қадағалауында қамсыз тіршілік етпек.
Маңғыстау облысы
