Дениссіз өткен бір жыл

Спорт • 22 Шілде, 2019

Дениссіз өткен бір жыл

Өткен жұма күні, яғни 19 шілдеде мұз үстінде, бар өнерімен күллі әлемді тамсандырған қазақстандық мәнерлеп сырғанаушы, даңқты спортшы әрі еліміздің мақтанышы Денис Теннің бұл фәнимен қоштасқанына да бір жыл толды. Мұзайдынның мұзбалағы саналған Денис Тен 25 жасында қапияда кісі қолынан қаза тауып, мәңгілік сапарына аттанған еді. Қыршын кеткен спортшының артында жоқтаушы жанкүйері мен қалың елі қалды...

Әли БИТӨРЕ

Осыдан тура бір жыл бұрын Денис Теннің Алматы қаласындағы Құрманғазы мен Байсейітова көшелерінің қиылысында қаскөйлердің қолынан ауыр жараланып, жансақтау бөліміне түскені туралы суыт хабар лезде тарап кетті. Елімізде ғана емес, шетелдерде де кеңінен танылып үлгерген Денистің бар әлемдегі жанкүйері оның амандығы үшін дұға тілеген еді. Өкінішке қарай, Денисті ажалдан арашалау мүмкін болмады. Бұл тек қазақ спортының ғана емес, мәнерлеп сырғанау әлеміндегі орны толмас қаза болатын... Денистің қазасы ешкімді де бейжай қалдырған жоқ. Барша Қазақстан халқы намысты ұлынан айырылып, қайғыдан қан жұтса, әлемнің әр түкпіріндегі жанкүйер танымал спортшыдан көз жазып қалғанына өкінді.

Миллиондаған жанкүйер жүрегінің төрінен орын алған талантты спортшы Денистің қазасынан соң, оны еске алуға арналған түрлі іс-шаралар үнемі өткізіліп тұрды. Атап айтар болсақ, 2018 жылдың 9 тамызында Денис Теннің анасы Оксана Тен ұлының атын өшірмеу, Денистің атынан түрлі іс-шараларды өткізіп тұру мақсатында қоғамдық қор ашқанын мәлімдеді.

2018 жыдың 7 қарашасында Денис Теннің туып-өскен Алматыдағы үйіне ескерткіш тақта орнатылды. Салтанатты шараға мәнерлеп сырғанаудан Кеңес Одағының және Ресей бапкері, бір кездері Денситі де жаттықтырған Татьяна Тарасова, Қазақстанның халық әртісі Роза Рымбаева, ресейлік мәнерлеп сырғанаушы, Денситің жақын достарының бірі Елена Радионова және тағы басқа құрметті азаматтар қатысып, спортшымыз туралы өз естеліктерімен бөлісті.

2019 жылдың басында Денистің жанкүйерлері, достары Алматы қаласының әкімдігіне Халық арена мұзсарайын Денис Теннің атына беру туралы үндеу жасап, онлайн қол жинауды бастады. Бір күннің ішінде мыңға жуық қол жиналды. Арада алты ай өтсе де, мұзсарайы спортшының атына әлі күнге дейін берілген жоқ. 13 ақпанда Денис Тен туралы «Денис Тен – Величайшее шоу» атты деректі фильм жарыққа шықты. Фильм Денистің төртінші әрі соңғы «Денис және оның достары» атты мұз айдынындағы шоуына дайындық туралы баяндайды.

22 маусымда Алматыда Денис Тенге арналған ескерткіш орнатылды. Ескерткіш спортшы қайтыс болған Құрманғазы – Байсейітова көшелері қиылысына орнатылған. Мүсінде спортшының 2014 жылы Сочидегі Олимпиадада өнер көрсету сәті бейнеленген. Бұл Олимпиадада Денис Тен қола жүлде ұтып алған еді. Ескерткішті Санкт-Петербург мүсіншісі Матвей Макушкин жасаған.

Сонымен қатар Денистің атындағы турнир Халықаралық коньки спорты түрлері федерациясының (ISU) күнтізбесіне енді. Ал 20 шілде күні Алматыда Қазақстан және әлем жұлдыздарының қатысуымен «Денис Тен және оның достары» атты мұзды шоу өтті. Шоуға Мао Асада, Елена Радионова, Татьяна Тарасова, Кейтлин Вивер, Эндрю Поже, Иван Букин, Александра Степанова қатысып, қалың жанкүйерге өз өнерлерін көрсетті.

Қазақстанның мәнерлеп сырғанаудан бай тарихы мен жеңіспен өрілген дәстүрі болмаса да, ел спортшыларының бұл спортта да жоғары нәтижеге таласы бар екенін Денис бүкіл әлемге мойындатты. Сол үшін де Денистің аты біздің жүрегімізден мəңгі орын алады.