Істің көзін табу – уақыт талабы
Сейсенбі, 14 мамыр 2013 1:43
Әдетте қандай да істің барысы бастапқы қадамға байланысты екені аян. «Сәттілікке тәттілік» дегендей, жұмыстың жандана жүруі қалпында жалғасып, жаңғырық қағуы жақсы жағдай қалыптастырады десек, сондай жағымды нышан өндірісті өңір тынысынан білінетіндігін атауға болады. Мұны жылдың алғашқы үш айындағы аяқ алыстың алымды болуына орайғы мәліметтер айғақтайды.
Сейсенбі, 14 мамыр 2013 1:43
Әдетте қандай да істің барысы бастапқы қадамға байланысты екені аян. «Сәттілікке тәттілік» дегендей, жұмыстың жандана жүруі қалпында жалғасып, жаңғырық қағуы жақсы жағдай қалыптастырады десек, сондай жағымды нышан өндірісті өңір тынысынан білінетіндігін атауға болады. Мұны жылдың алғашқы үш айындағы аяқ алыстың алымды болуына орайғы мәліметтер айғақтайды. Соған сүйенсек, аймақ экономикасының негізгі саласының басты көрсеткіші – өнеркәсіптік өндіріс көлемі 399,6 миллиард теңге құрауы жетістіктерге ұмтылудың үлкен ұшқынын көрсетеді. Рас, әлемдік қаржылық дағдарыс салқыны тимей өтпей отырған «Арселор Миттал Теміртау» АҚ пен «Қазақмыс» корпорациясы жұмысын бұрынғысынша сақтай алғанда өсу қарқыны бұдан гөрі жоғарырақ болар еді. Дегенмен, осындай жағдайларға қарамастан, дамудың жаңа белестеріне биіктеу мүмкіндігі күш пен қуаттың басқа да қайнар көздері аз еместігін танытады.
Бұл уақыт ерекшелігіне сәйкес бір икемділік болса, сондай-ақ инвестициялық белсенділіктің артуы өркендеу шараларын толастатпауға қолайлы жағдайлар жасап келеді. Облыс кәсіпорындарына дем берген 57 миллиард теңге инвестиция нәтижесінде іске асырылудағы 42 ірі жобаның 22-сі бүгінде толық күшіне енген. Жыл аяғына дейін тағы 10 жаңа өндіріс ашылып, 1135 жұмыс орны пайда болмақтығы құлашты кеңге жайдыра түседі. Бұл ретте «Сарыарқа» еркін экономикалық аймақтағы 11 компанияның өтімді өнімдер өндіруге кірісуінің ықпалы зор болып отыр.
Мұнымен бірге экономикалық тұрақтылықты қамтамасыз етуге шағын және орта бизнестің үлесі де салмақтануы оң құбылыс саналады. Мәселен, аталған сала бойынша өткен мерзімде 117 миллиард теңге өнім өндіріліп, қызмет көрсетілуі өңірдің екінші тынысына тың лептің дер кезінде есуіне қуантады.
Осындай өркенді өзгерістер облыс қазынасының молығуына игі септігін тигізуде. Бюджеттің кіріс бөлігіне бірінші тоқсанда ғана жоспардан тыс 1,2 миллиард теңге түсуі жағдайдың жалпы жай-күйін анық байқатар дерек. Соның нәтижесінде әлеуметтік бағдарламалардың тиянақты орындалуына қол ұзартылуда. Мысал үшін бұған дейін де тұрғын үй құрылысы жөнінен елімізде алдыңғы орыннан көрініп жүрген облыс осынау үлгілі үрдісті сақтап, биыл да көптеген тұрғынды қуанышқа бөлеуге берік. Оған үш айда 97 мың шаршы метр үй пайдалануға берілуі мықты негіз қалайды.
Аймақ басшысы Бауыржан Әбдішев бірінші тоқсанның қорытындысына арналған жиында айтып өткендей, өңірдің дамуына өзіндік серпін беруге тиіс мүмкіндіктер аз емес, мұқият талдап, қарауды қажет ететін мәселелер көп. Үдемелі индустриялық-инновациялық даму мемлекеттік бағдарламасының негізгі бағыттарын орындауды ерекше бақылауға алып, сапалы мониторингті қамтамасыз ету, шығарылатын өнімді қайта өңдеу бойынша жобаларды жүзеге асыру, инвестициялар тартуды ұлғайту, Біртұтас экономикалық кеңістік елдері кәсіпорындарымен бірлескен іс-қимылды жетілдіру қажеттігі алға қойылды. Істің көзін тапқанға табыс көл-көсір екені еске салынып, барлық деңгейдегі буындарға осындай міндет жүктелді.
Айқын НЕСІПБАЙ,
«Егемен Қазақстан».
