Қазақстан Республикасының Тұңғыш Президенті – Елбасы Нұрсұлтан Назарбаев «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауында инновациялық және сервистік секторларды дамытуға ерекше назар аудару керектігін баса айтқан болатын. Табиғат байлығын тиімді пайдалану мақсатында Сарысу ауданында «Жаңатас жел электр стансасының» құрылысы басталды. Себебі ауданда Аққырқа және Арыстанды Қарабас желінің қуаты ерекше. Осы бір табиғат байлығын игерудің тың жолы ретінде құрылысы басталған стансаның басты мақсаты жергілікті тұрғындарды жұмыспен қамту және ауданда жұмыссыздар санын азайту болып отыр.
Аталған станса Сарысу ауданы Түркістан ауылдық округінде орналасқан. Құрылысы басталған нысан 2020 жылы ақпан айында іске қосылатын болады. Аудан әкімдігінің мәліметінше, электр қуатын бөлу схемасы әзірленіп, республикалық «KEGOG» акционерлік қоғамының келісімі алынған. Бүгінгі таңда аталған стансаның құрылысын жүргізуші бас мердігер ретінде Қытай Халық Республикасының «China Power International Holding» компаниясы анықталған. Қазіргі кезде компания өкілдігі мен жұмысшылары Сарысу ауданына келіп, құрылыс алаңында дайындық пен жобалау жұмыстарын жүргізуде. Мұнда жұмысшыларға қажетті контейнерлер қойылып, тиісті техникалар жұмылдырылған.
Салынып жатқан «Жаңатас жел электр стансасының» жалпы қуаты 100 мВт-ты құрайды. Бүгінгі таңда жел энергиясы елімізде қарқынды дамып келе жатқан сала. Бұл кәсіпкерлер үшін жел күші арқылы электр энергиясын өндіруде тиімді инвестициялық жобалар болып саналады. Ал Сарысу ауданында салынып жатқан жел электр стансасы еліміздің өңірлері арасында жаңғырмалы энергия көздерін дамытуға бағытталған. Жалпы, жел электр стансасы желдің кинетикалық энергиясын электр энергиясына түрлендіретін қондырғы. «Жаңатас жел электр стансасы» жел қозғалтқышынан, электр тогының генераторынан, сол жел қозғалтқышы мен электр тогының генераторын автоматты түрде басқаратын құрылғыдан тұрады. Желдің күші қондырғының қалақтарын айналдырып, генератордың білігін қозғалтады. Ал генератор өз кезегінде электр энергиясын өндіреді.
Сарысу ауданына арнайы келген қытайлық мердігер компания өкілдері Го Цян, Чжан Лян, У Аньцзян, Вэй Ли және өзге де азаматтар бұл жобаның өңір экономикасы үшін барлық жағынан тиімді екенін айтады. Бұл ретте Сарысу ауданының әкімі Қанатбек Мәдібек те маңызды жобаның ауданның одан әрі өркендеуіне қосатын үлесінің мол екеніне тоқталды. Сонымен қатар аудан әкімі құрылысқа қажетті барлық заттарды жергілікті жерден алуды ұсынып отыр. Тағы бір мәселе, станса ашылатын Түркістан ауылдық округінде тұратын тұрғындар мен өзге де мал баққан азаматтардың қауіпсіздігі. Бұл ретте жергілікті азаматтардың қауіпсіздігіне баса назар аударылып отыр.
Жалпы, аталған жобаны «Жаңатас жел электростансасы» жауапкершілігі шектеулі серіктестігі ұсынған. Бүгінде құрылысы қарқын алған станса аяқталғанда төрт мезгілде де тынымсыз соғатын Аққырқа мен Арыстанды Қарабас желі өңір экономикасының дамуына өзіндік үлесін қосатын болады.
Жамбыл облысы
