«Тыныстың» тынымсыз тірлігі ұзақ мерзімді мүдделерге бағытталған

Жұма, 7 маусым 2013 2:30

ТАҒЫЛЫМДЫ ТАРИХ. Көкшетау мен қала тұрғындары тағдырында айрықша орны бар «Оттегімен тыныстау аппаратуралары» зауытын салу жөнінде КСРО Министрлер Кеңесінің қаулысы 1953 жылы қабылданғанымен, оның құрылысы 1959 жылы аяқ­тал­­ған еді. Сол жылы құрылыс ұйым­­дары мен кеніштерге 400 ваго­нетка жөнелтілген болатын. Бірақ, бұл зауыттың негізгі өнімі емес еді. Келесі жылы түпкі мақ-сат жолындағы медициналық жаб­дықтар шығарыла бастады. Ал, 1964 жылы мұнай-газ өндірісі үшін ре­дукторлар, «КБ-1» клапандары, жоғары қысымға шыдас беретін тетіктер дайындау игерілді. Тіпті, балалар ойыншықтары да зауыт белгісімен дайындалып жатты.

Жұма, 7 маусым 2013 2:30

ТАҒЫЛЫМДЫ ТАРИХ. Көкшетау мен қала тұрғындары тағдырында айрықша орны бар «Оттегімен тыныстау аппаратуралары» зауытын салу жөнінде КСРО Министрлер Кеңесінің қаулысы 1953 жылы қабылданғанымен, оның құрылысы 1959 жылы аяқ­тал­­ған еді. Сол жылы құрылыс ұйым­­дары мен кеніштерге 400 ваго­нетка жөнелтілген болатын. Бірақ, бұл зауыттың негізгі өнімі емес еді. Келесі жылы түпкі мақ-сат жолындағы медициналық жаб­дықтар шығарыла бастады. Ал, 1964 жылы мұнай-газ өндірісі үшін ре­дукторлар, «КБ-1» клапандары, жоғары қысымға шыдас беретін тетіктер дайындау игерілді. Тіпті, балалар ойыншықтары да зауыт белгісімен дайындалып жатты.

Зауыт 70-80-жылдары ме­ди­­циналық жабдықтарға қа­тысты жұмыстарды жанданды­рып, қолдан тыныс алдыру ап­па­ра­тураларының жетілдірілген түрлерін көптеп шығара бастады. Халықаралық стан­дарттардағы бұл өнімдер социа­листік елдердің емдеу-профи­лак­тикалық ме­ке­мелеріне, КСРО Қарулы күштеріне жөнелтіліп тұрды. Мұнда жыл сайын 16 миллиард теңгенің өнімі шығарылатын.

Тәуелсіз мемлекетіміздің өтпе­лі кезеңдегі табанды саясаты «Тыныс» атауын алған зауыттың шын мәніндегі тынысын ашты. Кәсіпорында 1996-2000 жылдары конверсиялық шаралар жүргізіліп, өндірістік бағыт өзгертілді. Халық шаруашылығына қажетті таразылар, есік құлыптары, өрт сөндіру құралдары, ыстық және суық су есептегіштер, газ монометрлері, ауыл шаруашылығы үшін жылжымалы минералды тыңайтқыш шашқыштар және басқа бұйымдар шығару қолға алынды.

ИННОВАЦИЯЛЫҚ  ЖАҢА  СЕРПІЛІС. Республика Үкіметінің индустриялық-инновациялық даму бағдарламасының өнеркәсіпті әртараптандыру бағытын жүзеге асыру мақсатында «Тыныс» ак­цио­нер­лік қоғамы 2003 жылы «Қа­зақ­стан Инжиниринг» ұлттық ком­паниясының құрамына енді. Бұл кәсіпорынның қайта түлеп, өрге басуындағы ұтымды қадам болды.

Белгісіз мерзімге демалысқа жі­берілген білікті маман-жұ­мыс­шылардың жүзінде жалын ойнады. Зауыт ғаламат серпіліс құша­ғын­да еді. Араға бір жыл салып, я­ғни 2004 жылы акционерлік қо-ғамға халықаралық «TUY CERT» компаниясының сапа менеджменті жүйесіндегі «ISO 9001:2000» сертификаты тапсырылды. Бұл сол кез­­дегі үлкен жетістік болатын. Қа­зіргі уақытта заманалық кәсіп­орын қатарындағы «Тыныс» рес­пуб­­ликамыздың экономикалық өмі­ріне белсене қатысушы ретінде әй­гілі. Көкше зауыты бүгінгі таң­да «Қазақстан темір жолы», «Қаз­мұнайгаз», «Казатомпром», «Қа­зақ­телеком», «Казтрансойл», «Каз­трансгаз», «KEGOK» акционерлік қоғамдары сияқты ірі компанияларға өнімдерін жеткізеді. Сондай-ақ, «Улан-Уде авиация зауыты» ААҚ, «Қазан тікұшақ зауыты» ААҚ және «МИГ» РСК ААҚ-пен әріптестік бай­ланыс нығайып келеді. Жалпы, мұн­дағы экспорттық әлеует зауыт шы­ғаратын өнімдердің тең жартысын құрайды.

«Тыныс» тауар өндіру көр­сет­кіш­терін сатылап өсіріп келеді. Мә­селен, 2005 жылы ол 501 миллион теңге деңгейінде болса, 2010 жылы 2,6 миллиард теңгеге жетіп, 523 пайыздық өсімді құрады. Ал, 2011 жылы 2010 жылға қарағанда 139 пайыздық көрсеткіш қамтамасыз етілді. Әр адамға шаққандағы еңбек өнімділігі 2005 жылғы 833 мың теңгенің орнына 2011 жылы 5967 мың теңгеге көтерілді. Бас директор М.Керейбаев жетістік сыры өндірісті инновациялық технологиямен жаңғыртумен байланыстырады. Қажырлы еңбек ескерусіз қалмай, кәсіпорын 2005 жылдың қорытындысымен республика Үкі­метінің «Сапа саласындағы табыстары үшін» сыйлығын иемденді.

Акционерлік қоғамның бас­ты бағыты ірі инвестициялық жо­ба­­ларды жүзеге асыру арқылы өн­ді­рісті қуаттандыру мен жоғары сұра­ныс­тағы өнім түрлерін молай­туды көздейді. Игі қадам 2005 жы­лы қолға алынып, «Ауыз су» мемлекеттік бағдарламасы шең­берінде диаметрі 10-нан 250 мил­ли­метрді қамтитын полиэтилен құбырлары шығарыла бастады. Аталған өнім республикамыздың газ шаруашылығында да кеңінен қолданылуда. Германияның «Krauss Maffei» компаниясының жаб­дық­тары орнатылған желіні Қазақстан Рес­публикасының Пре­зиденті Н.На­зарбаевтың іске қосуы зауыт өміріндегі елеулі оқиға санала­ды. Осы ретте, немістің әйгілі ком­паниясы 2009 жылдың бірінші жар­тыжылдығында пайдалануға берілген екінші жобаға да белсене қатысқанын айтқымыз келеді.

Сондай-ақ, «Тыныс» цехтарында салааралық және өңіраралық экономикалық интеграция талаптарына сай өрт сөндіру құралдарының жетілдірілген 6 түрі, теміржолшылар игілігіндегі 55 атаулы өнім мен авиация саласына қажетті 16 түрлі жабдықты дайындау іске асырылды. Зауыт 2007 жылдан Көкшетауда құрастырыла бастаған «КамАЗ» жүк автомобильдеріне қажетті жер­гілікті тетіктерді шығару тізбесін көбейтіп келеді. Медицина саласында өкпені оттегімен тыныс алдыруды қамтамасыз ететін жаңа «Көкшетау-4П», «АДРМ» аппараттары жасалып, сынақтан ойдағыдай өтті және ол республикамыздың емдеу-сауықтыру орындары мен Қарулы Күштерінде қолданылуда.

«Тыныс» акционерлік қо­ға­мының 2010-2015 жылдарға ар­нал­ған стратегиясы нақты жос­пар­ларға негізделіп, инвестициялық жобаларға тартымдылығымен тұжырымдалған. Мұнда 2010 жылы «Диаметрі 560-1000 милли­метрлік полиэтилен құ­быр­лары өндірісі» аталатын бірінші жоба іске асырылды. «Даму – Өн­діріс» бағдарламасы аясында алғашында екінші деңгейдегі бан­к­тің 16,5 пайыздық несие қаражаты жұ­мылдырылған болатын. Кейін пайыздық үстеме «Даму-Өнді­ріс­тің» қайта қаржыландыруы, «Биз­нестің жол картасы-2020» бағдар­ламасының қолдауы және мем­лекеттік қаражаттар есебінен айта қаларлықтай төмендеді.

Келесі, «2012-2017 жылдар ара­лығында газдандыру моделі бойынша құю өндірісін игеру» жобасы да мем­лекеттің қолдауымен ойдағыдай жүзеге асып келеді. Мұнда да «Даму-Өндірістің» алғашқы кезеңдегі 12,25 пайыздық несие үстемесі 8 пайызға дейін төмендегенін өн­ді­ріс­тің тұрақты да сенімді жолға қойыл­ғанымен байланыстыруымыз керек.

Биылғы жылдың қаңтарында «Брон­ды жилеттер өндірісі» ин­вестициялық жобасы өнім бере бас­тады. Қызметтің жаңа бағыттарына және өндірісті әртараптандыруға бағытталған жобаның құны 1247138 мың теңгені құрайды. Ұмтылыс көп ұзамай тұтынушылар назарын аударды. Зауыт 2013 жылғы  25 сәуірде келісімшарт негізінде  Қор­ғаныс министрлігіне алғашқы 2000 дана бронды жилеттерді жеткізді. Осы орайда, аталған келісімшарт бойынша 10000 дана өнім дайындау қажеттігін ескерсек, жобаға жұм­сал­ған қаржы мерзімінен бұрын өте­летіндігін аңғаруға болады.

«Тыныс» АҚ басшылығы биылғы жылдың жоспарында «Маталық емес (геотекстиль) материалдар өн­ді­рісі» инвестициялық жобасын іске асыру қамында екен. «Қазақстан-Инжиниринг» ұлттық компаниясы жобаны пайызсыз несиемен қар­жы­ландыру туралы шешім қабылдауы зауыт абыройын көтере түседі. Бұған қосымша, биыл ультрадыбыстық есептегіштердің, манометрлердің, ре­зина-техникалық бұйымдардың же­тілдірілген түрлерін кеңейту бағы­тында мақсатты жұмыстар атқа­рыл­мақ.

ӘЛЕУМЕТТІК  МАҢЫЗДЫ  МІНДЕТТЕР. Елбасы өз Жол­дауында: «Біз әлеуметтік-маңызды стратегиялық функцияларды атқа­ратын және өзінің тиімділігін дә­лел­дейтін салаларды ғана қолдауға тиіспіз», деп атап көрсетті. «Тыныс» дәл осы ағымдағы кәсіпорын екендігін айғақтап отыр. Мұндай міндет ең алдымен экономикалық әлеуеттің артуымен жүзеге асырылады. Ұжым 2013 жылы 5083,8 миллион теңгенің өнімін өндіруді жоспарлап, был­тыр­ғыдан 10 пайыздық артық көрсет­кішті межелесе, үстіміздегі жылдың төрт айында 1594 миллион теңгенің өнімі шығарылып, жоспар 128 пайызға орындалды. Осы мер­зімде алынған таза кіріс 161,4 мил­лион тең­гені құрап отыр. Мұның өзі зау­ыт­тың әлеуметтік саясаттағы өне­ге­лі қадамдарына жол ашатыны анық.

Қазір ұжымда 803 адам жұмыс істесе, оның 186-сы 30 жасқа дейінгі азаматтар. Бұл өзіндік ерекшелігі бар кәсіпорынның кадрлық құрамының тұрақтылығын айқындайды. Соған қарамастан, өркендеу бағытындағы зауытта білікті конструкторларға, элек­троншыларға, күрделі электро­механикалық жабдықтарды пайда­ла­нушы және қызмет көрсетуші ма­мандарға сұраныс өсе түсуде. «Тыныста» жаңа қабылданған жұ­мысшыларды теориялық және өндірістік учаскелерде оқытуға 136 сағаттық уақыт бөлініп, қа­таң сынақ алынады. Сондай-ақ, «Ұс­таздық», «Тәжірибеден өту» жүйе­сі енгізілген. Инвестициялық жоба­лардың іске асырылуына бай­ланысты 20 ма­ман Польша мен Ресейде, 70 кісі Қазақстанның әр­түрлі оқу орын­дарында білімін же­тілдіріп, қайта даярлықтан өтіпті. Жастардың кәсіби, әлеуметтік-мәдени және рухани дамуына септік жасау мақсатында «Жас Тыныс» қо­ғам­дық бірлестігі құрылғаны да құп­тарлық.

Жұмыс беруші мен ұжым ара­сын­дағы келісімшарт негізінде әлеу­меттік қолдау шараларының ау­қы­мы біршама кеңейтілген. Мәсе­лен, бала күтіміне байланысты дем­алыстағы ана 3 жыл бойы еңбекақымен қамтамасыз етіледі, мектеп жасына дейінгі балаларға ай сайын 10 мың теңгеге дейін ақшалай көмек көрсетіледі, сәбилі болған отбасына 100 мың теңгелік «бауы берік болсын» байланады. Бұған қоса, зауыт жұмысшыларына оннан астам бағытта қаржылай қолдау қарастырылған. Акционерлік қоғамда «Қазақстан – менің мақ­та­нышым!», «Ұлттық дәстүрлер», «Жі­гіт сұлтаны», «Күлкі алаңы», «Ма­ман­дығы бойынша озат», «Үлгілі цех, бөлім» байқауларын қызықты өткізу дәстүрге айналған. Бұл шаралар «Қазақстан-Инжиниринг» ұлт­тық компаниясының 10 жылдығы қар-саңында жаңа мазмұнмен жандана түспек.

«Тыныстықтар» тағы да бір игілікті бастама көтеріп отыр. Биыл олар көп жылдардан бері ұмыт қал­ған тұрғын үй құрылысымен ай­на­лысуды қолға алды. Қазір дайын­дық жұмыстары қызу жүріп жатыр. Амандық болса, зауыт жұмыс­шы­ларына 45 пәтерлі тұрғын үйдің кілтін тапсыру салтанаты да алыс емес сияқты.

Бақберген АМАЛБЕК,

«Егемен Қазақстан».

Көкшетау.

–––––––––––––––––––

Суретті түсірген

Ермұрат ДОСЫМОВ.