Әлия Жүсіпқызы бала кезден тігіншілік өнерді жаны сүйді. Елден ерекше киінуді, өзгеше талғамды қалап тұратын еді. Мектеп бітірген соң ағылшын тілі бағытында білім алып, аудармашы, шет тілі мұғалімі болып қызмет атқарды. Кішкентай қызы өмірге келіп, ана атанғанда Әлияның тігінге деген махаббаты қайта оянды. Балдырғанның киімдерін өзгелермен бірдей қылмай, өзі тігіп кигізіп жүрді. Осылайша балалар киімі дизайнын этностильде ойлап табу қажет деген идея туды. Арман мен мақсат үлкен шабытқа ұласып, балалар киімі, анасы мен қызы деген тізбекпен киім тігуді бастап кетті. Ол үшін арнайы курста оқып, тігу техникасын жетілдірді. Осы жылдың қаңтар айында Аi_hanym_kids брендінің негізін қалап, өз ісін ашты. Іскер қыздың мақсаты – ата-бабаларымыздан бүгінге дейін жеткен ою-өрнектер мен ұлттық құндылықтарымызды заманауи нақышпен үйлестіріп, жаңаша үлгіде киім тігу. Әлияның басқа дизайнер, тігіншілерден ерекшелігі – табиғи зығыр матасын ғана пайдалануы. Зығыр матасын ұлттық болмыспен үйлестіріп, сәнді көйлектер тігуі.
Жас дизайнердің киімдеріне сұраныс біртіндеп артып келеді. Жақында Нұр-Сұлтан қаласында өткен «Ұлттық өнім – 2019» көрмесіне Ақтаудың атынан барып қатысқанда, оның киім үлгілеріне айтулы дизайнерлердің біразының көзі түскен. Оның өзіндік дара стилі, қайталанбас қолтаңбасы бар екенін, болашақта үлкен жетістіктерге жетуге әбден лайық екенін айтушылар көбейді. Көрме соңы жәрмеңкеге ұласып, келушілер Әлияның көйлектерін сатып алды. Қазір айына 5-6 көйлек тігеді. Жаңа үлгілерін ірі сауда орталықтарына да шығара бастады. Киімдердің құны тігу техникасына қарай бағаланады.
Тігіншінің айтуынша, киімдердің тігілуі мен матасында мін жоқ. Өйткені көйлектердің дизайнын ойлап табу, пішу, тігу, өрнектермен сәндеу барлығы Әлияның өз қолынан шығады. Ал шикізаттар мен зығыр матасы Ресей, Беларусь елдерінен, АҚШ-тан жеткізіліп отыр. Болашақта жеке тігін шеберханасын ашып, жұмысшы санын көбейтіп, өнімді арттыруды мақсат етеді. Жалдамалы тігін шеберханасында жүрген ол діттеген мақсатына айқын бет бұрды.
«Алтын оймақ» байқауы туралы Әлия әріптестерінен естіді. Оның шарттары мен талаптары көңіліне қонып, көп ойланбай қатысуға бел буды.
– Ісін енді бастаған дизайнерлер өздері ойластырып, тігіп, тапсырыс қабылдаса, қазір олар оқып, көрмелерге қатысып, ұлттық киім ғана емес, күнделікті өмірде киетін киімдер шығарып жатыр. Өңірде ғана емес, басқа қалаларға киімдерін сататын белгілі жетістікке жеткен дизайнерлер бар. Олар осы байқауға қатысып, бизнесін дамытуға гранттар ұтып алуына болады. Дизайнер мамандығы Қазақстанда мұнайшы секілді сұранысқа ие мамандық болуы керек, дейді Маңғыстау облысы іскер әйелдер кеңесі жанындағы «Маңғыстау облыстық киім дизайнерлер одағы» қауымдастығының тең құрылтайшысы Диана Ботаева.
Маңғыстау облыстық іскер әйелдер кеңесінің төрайымы Сәуле Салихова «Алтын оймақ» байқауы отандық дизайнерлердің елге танылуына ықпал етеді дейді.
– «Алтын оймақ» – Қазақстанда талантты, ешкімге белгісіз, аты жоқ адамдарды шығаратын байқау. Оны жыл сайын өткізу жоспарда бар. Алғашқы жылы күмәнмен қарайтындар көп болады. Бірінші байқау қалай өтеді, соған байланысты адам талаптана береді. Бұл байқау дизайнерлердің серіктестік орнатып, бірігуіне мол мүмкіндік береді. Бір адамға көтерілу өте қиын. Бірігіп шағын өндіріс құрса, нәтиже болады, дейді ол.
«Алтын оймақ» байқауында комиссия жеңімпаздарды іріктейді. Екінші кезеңде үміткерлер қоғамдық онлайн-дауыс беруге қатысады. Бас жүлдеден үміттілер елордада өтетін «Жеңіл өнеркәсіп» форумында жарияланады.Үшінші кезеңде алты лауреаттың ішінен жеңімпаз таңдалады, ал марапаттау салтанаты желтоқсан айында өтеді.
Маңғыстау облысы
