Жасыл желегі жайқалған ғажайып өлкеге шартараптан жиналған балалардың шаттық үні қозыкөш жерден естіледі. Таяп келіп тілдестік. Орта бойлы ақсары бала Нұрберген Еркін Баян-Өлгий аймағынан келіпті. Әріптестеріміздің бірі сөйлесіп жатыр.
– Еліңе барған соң Бурабай баурайында көрген қызықтарыңды, танысқан достарың туралы айтатын боларсың?!
– Елім осы жер емес пе?! Баян-Өлгийге барған соң әрине айтамын, – деді әлгі бала табан аузында жұлып алғандай.
Әншейінде аузынан сөз саулап тұратын әріптесімнің аузына құм құйылды. Шынында да, дүниенің төрткүл бұрышынан жиналған балалардың атажұрты, алтын қазығы қазақ елі емес пе?!
Алдымен әсем безендірілген сахна төрінде салтанатты рәуіш басталды. Би. Қазақтың ұлттық биі. Болат тұяқты тұлпардың дүбірі, қыран қанатының суылы, қызғалдағы жәудіреген қызылды-жасылды дала төсіндегі беймарал өмір, шадыман шаттық. Бар баланың жанары жәудіреп әлгі көрініске назар аударған. Сәлден соң шаңырақ бейнесі. Біртұтас, мызғымас шаңырақ. Мәңгілік елдің шаңырағы. Ашық дала төсіндегі сахна маңында жайғасқан тәмам бала да сол шаңырақтың ертеңгі бір уығы іспетті.
Ауысымның ашылу рәсімінде алдымен сөз сөйлеген Ақпарат және қоғамдық даму министрінің орынбасары Марат Әзілханов бала жанын баураған көңілді де көркем тілмен біраз деректі жайып салды.
– Осы шара он жыл қатарынан өткізіліп келеді. Қазақ баласы қай мемлекетте жүрсе де, оның жалғыз-ақ Отаны бар, ол – Қазақ елі. Бұл жайында Елбасы Нұрсұлтан Назарбаев та аталы сөзін айтқан болатын. Шараның негізгі міндеті – әлемнің әр қиырында жүрген балаларға ата жұрттың тарихын, тамаша дәстүрлерін, әдемі әдет-ғұрпын, әуезді тілін, мәнді мәдениетін таныту. Міне, сонда ғана балалардың бойына халқымыздың өзімен бірге сан ғасыр бойы жасасып келе жатқан ұлттық қадір-қасиетін сіңіре аламыз. Сіздердің алтын қазықтарыңыз – қазақ елінің қасиетті топырағы.
Ағаларының айтқан ақ тілегін бала біткен толқып отырып тыңдады. Ал жүргізушілер болса үш тілде сөйлеп тұрды. Шет жайлап, шалғайда өсіп келе жатқан балалар ана тілін білмейтін шығар деп ойлағанбыз. Сөйтсек, олай емес екен. Ресейден келген қаршадай қыз Әмина Жақсылықова ана тілінде өте жатық сөйлейді.
– Мәскеу қаласынан 300 шақырым жерде Иванова деп аталатын қала бар. сондағы білім ошағының 7 сыныбында орыс тілінде білім алудамын. Үйде тек қана қазақ тілінде сөйлейміз. Өйткені ата-анам менің ана тілімді білуіме ерекше мән береді, – дейді Әмина.
Германиядан келген Айша Құлғарина 4 сыныптың оқушысы. Бірнеше тіл біледі. Қазірдің өзінде оң-солын танығаны көрініп-ақ тұр. Өскен соң Қазақстанға ораламын деп қояды. «Тілегіңнен айналдық!» дедік біз. Салтанатты жиында сөз сөйлеген Дүниежүзі қазақтары қауымдастығы төрағасының орынбасары Арғын Оспанов Қазақстанда жастардың алдынан жарқын жол ашылғанын айтқан болатын. Берік білім алуға барлық жағдай туған. Ел жастары қазір бәсекеге қабілетті.
«Отандастар» қорының вице-президенті Мағауия Сарбасов пен Ресей Федерациясының Қазақстандағы елшілік кеңесшісі Кирилл Тиллябев халықаралық балалар құрылтайының тиімді тұстарына тоқталды.
– Ресей Федерациясында ресми есеп бойынша бір жарым миллионға жуық қазақ жергілікті жұртпен тату-тәтті тіршілік етуде. Олардың туып-өскен жері Ресей топырағы болғанымен, тарихи Отаны Қазақстан, – деді Кирилл Геннадьевич, – менің ойымша, бәлкім одан да көп болуы мүмкін. Аумалы-төкпелі талай заман өтті ғой. Біз ежелден достық қарым-қатынастағы елміз. Осы балалар – мемлекеттеріміздің арасындағы шынайы достықты одан да бекіте түсетін ұрпақ.
Қызыққа толы қызулы күндер текке өтпейді екен. «Балдәурен» балалар оқу-сауықтыру орталығының баспасөз хатшысы Айнұр Ерденованың айтуына қарағанда, шетелден келген балалар қазақтың ән-жырын жаттайды. Мәселен, ана, туған жер жайлы естіген жанның есінен кетпес жауһар ән-жырлар өздерімен бірге ата жұрттан ала кететін тәбәрік іспетті.
Ақмола облысы,
Бурабай ауданы
