Еңбегіне лайық талай құрметке ие болды. Омырауы толған орден, медаль. Сырдария ауданының құрметті азаматы.
Биыл тоқсанға шыққан ақсақал әлі қуатты, бойы тіп-тік. Киімді мезгіліне қарай киеді, үстіне шаң жуытпайды. Шалбар-көйлек, галстугін жұқа дәкені ылғалдап, өзі өтектейді.
Біз барғанда ардагер аға кең залдың төрінде жазу столындағы орындықта отыр екен. Алаңдай берді:
– Пошта неге кешігіп жатыр? Таңертеңгі оннан қалдырмай газеттерімді әкелетін еді. Поштадағы қыздарға телефон соғайыншы деп орнынан қозғалды.
– Қыздарым-ау, газет кешігіп жатыр ғой.
– Хамит аға, әлгі хат тасушы қыздар сіздің үйге аттанып кетті. Қазір барып қалар.
– Ә, жарайды. Сыртқа шығайыншы, деп Хамекең дарбаза сыртына шықты. Әудем жерден хат тасушы қыздар көрінді. Сәлден соң бір бума газетті ардагер құшағына қысты. Жүзі жадырап қоя берді. Дереу бөлмесіне кірді. Алдымен өзінің сүйікті бауыр басқан «Егемен Қазақстанның» әр бетіне зер сала көз жүгіртті. Телефонға қол көтеріп, тұс-тұстағы сыйлас азаматтарға қоңырау шалды.
– Бүгінгі «Егеменді» алдыңдар ма? Мырзатайдың Роллан жайында жазғанын оқыдыңдар ма? Әлгі Баймұрат батыр жайында жазылған дүние жақсы екен. Сыр сүлейі Тұрмағамбет Ізтілеуовтің жаңа қолжазбасы табылыпты, оқыңдар.
Ардагер осылайша күн сайын сыйлас азаматтарды мазалайды. Жиын-жиналыстарда «Егемендегі» ана дүние, мына дүниені оқыдыңдар ма деп қамшылайды, басылымдардағы өткір сөздерді қойын дәптеріне жазып, оны да тілге тиек етуден жалықпайды.
Бір кездегі осы «Егеменде» еңбек еткен Әзілхан Нұршайықов, Жекен Жұмаханов, Мұқан Иманжанов, Нұри Мұфтақтардан сөз қозғайды. Баспасөз дарабоздары Шерхан, Сапар, одан соң Ұзақ Бағаев жайында, Ұзақтың жазушы Зейнолла Шүкіров жайында жазған «Құрыш қазақ» атты очеркін майын тамыза айтқанда сусының қанады. Шерхан, Камалдардың жазысқан хаттарын, Шерағаның «Бір кем дүниесін» жалғастырғанда, таңырқайсың.
Сырдың сырбаз ақсақалы Хамит Ембергенов қазір 33 немере, 70 шөбере, 2 шөпшектің құшағында. Өсірген он ұл-қызының бәрі де жоғары білімді. Солардың ыстық құшағына бөленіп отырғанын жыр етіп айтудан жалықпайды.
– «Егеменнің» 100 жылдығы – үлкен қуаныш. Бұл менің елу жыл бойы үзбей жазылған, әр саны есіме ұмытылмас әсер қалдырған газетім. Басылымдағы қаламы ұшқыр журналистердің қалам сілтер қадамына қуанамын. Ардагерлер қауымын алдағы жылға жазылуға белсенділік танытуға шақырамын. Әр шаңырақта басылымды сүйсіне, асыға оқитындар көбейсе, – дейді ардагер Хамит Ембергенов.
Қайырбек МЫРЗАХМЕТҰЛЫ
